दमक,३० पुस । माघे संक्रान्तीको अघिल्लो दिन आज झापाको दमक बजार तरुलमय बनेको छ। दमकको मुख्य सब्जी बजार अगाडि बिहानैदेखि तरुल किन्न आउने उपभोक्ताको बाक्लो भिड देखिएको छ । सेतो तरुल, पिँडालु, सिमल तरुल, स्कुसदेखि वनतरुलसम्मका थुप्रै प्रकारका तरुल बजारमा सजिएका थिए ।
माघे संक्रान्ती सूर्य उत्तरायण प्रवेश गर्ने दिनका रूपमा चिनिन्छ । यो पर्वलाई नयाँ ऊर्जा, स्वास्थ्य र परिवारसँगको सामूहिक भोजनसँग जोडेर हेरिन्छ । यही कारण माघे संक्रान्ती नजिकिँदै जाँदा तरुल, चाकु, घिउ र तिलजन्य परिकारको माग हरेक वर्ष बढ्ने गरेको छ ।
मागे संक्रान्तीको दिन तरुल अथवा माटो मुनी फलेको फल्ने फल वा तरकारी खानुपर्ने विभिन्न धार्मिक र वैज्ञानिक विश्वासहरु पनि छ । माग महिनामा जाडो मौसम हुने गरेको र यही जाडोबाट आफ्नो शरिरलाई बचाउन तरुल जस्ता फलहरुले हाम्रो शरिरमा पोषण दिने हुने भएकाले पनि मागे संक्रान्तीको अवसरमा तरुल खाने गरिएको विश्वास राख्नुहुन्छ दमक ८का स्थानीय भिम सुवेदी ।
पहिल्यै देखी मागे संक्रान्तीको दिन तरुल खाले चलन चलीआएको भएकाले आफूले पनि यो दिन तरुल खानुपर्छ भन्ने विश्वास राख्नुहुन्छ दमक ७ की राज देवी शाह ।
बजारमा उपभोत्ताको अत्याधीक भिड देखिएपनि व्यापार भने खासै उत्साहजनक नभएको व्यवसायीहरुको भनाई छ । माघे संक्रान्तीको अघिल्लो दिनमा पनि विगतको तुलनामा यो वर्ष त्यती राम्रो नभएको बताउनुहुन्छ दमक सब्जी बजार अगाडी तरुलको व्यापार गर्न बस्नुभएका व्यावसायी श्याम थापा ।
विभिन्न पहाडी क्षेत्रबाट तरुल बेच्न ल्याउनुभएकी पाँचथरकी मनु सोरेनको पनि भनाई उस्तै छ । यो वर्ष तरुलको खासै व्यापार नभएको उहाँको भनाई छ ।
परम्परा, स्वास्थ्य र संस्कृतिसँग जोडिएको तरुलको किनमेलमा उपभोक्ता व्यस्त देखिए पनि व्यापार भने व्यवसायीले अपेक्षा गरेजस्तो हुन सकेको छैन ।
