अमेरिका, ३ जेठ/ नेपालीभाषी भूटानी समुदायको विस्थापन र पहिचानको कथा बोकेको चलचित्र ‘यो मन त मेरो नेपाली हो’ ‘टोकियो लिफ्ट–अफ फिल्म फेस्टिभल २०२६’का लागि आधिकारिक रूपमा छनोट भएको छ । निर्देशक मित्र प्रधान (नर)को यस चलचित्रले १०५ भन्दा बढी राष्ट्रिय तथा अन्तर्राष्ट्रिय फिल्मलाई पछि पार्दै फेस्टिभलमा स्थान बनाएको हो ।
यसअघि चलचित्रले यूकेको मिल्टन केन्स इन्टरनेशनल फिल्म फेस्टिभल २०२५ मा उत्कृष्ट छायांकन पुरस्कार तथा सान फ्रान्सिस्को इन्टरनेशनल न्यू कन्सेप्ट फिल्म फेस्टिभल २०२५ मा ‘एक्सलेन्ट फिचर फिल्म अवार्ड” अवार्ड प्राप्त गरिसकेको छ ।
भूटानी नेपालीभाषी समुदायको भाषा, पहिचान र निर्वासनको पीडालाई केन्द्रमा राखेर निर्माण गरिएको यस चलचित्रले अन्तर्राष्ट्रिय स्तरमा नेपाली सिनेमाको उपस्थितिलाई थप बलियो बनाएको छ ।
‘यो मन त मेरो नेपाली हो’ का निर्देशक मित्र प्रधान (नर) ले यो चलचित्रलाई नेपाली भाषा, पहिचान र विस्थापित समुदायको भावनात्मक कथालाई सम्मान गर्ने सिर्जनात्मक प्रयासका रूपमा प्रस्तुत गर्नुभएको छ । तर, नेपालीहरूभन्दा अन्य भाषी दर्शकहरूले यस चलचित्रलाई बढी चासोका साथ हेरिरहेका छन् । निर्देशक प्रधानले सबै नेपाली समुदायलाई चलचित्र हेरेर आफ्नो भाषा, संस्कृति र पहिचानप्रति थप सचेत हुन आग्रह गर्नुभएको छ ।
शिवम अधिकारीको पटकथा, सौरभ लामाको छायांकन तथा रोशन श्रेष्ठ र आयुष समालको अभिनयले चलचित्रलाई थप सशक्त बनाएको छ । विजय बराल, बुद्धि तामाङ र विल्सन विक्रम राईजस्ता चर्चित कलाकारहरूको उपस्थितिले पनि फिल्मको गहिराई बढाएको छ ।
निर्देशक प्रधानकाअनुसार यो चलचित्र केवल एउटा कथा नभई भाषा, संस्कृति र विस्थापित समुदायको सामूहिक स्मृतिप्रतिको सम्मान हो । सन् २००७ पछि विश्वका विभिन्न देशमा पुनर्वास भएका नेपालीभाषी भूटानीहरूले नयाँ भूमिमा नयाँ जीवन सुरू गरे पनि भाषा र साहित्यमार्फत आफ्नो सांस्कृतिक जरा जोगाइरहेको यथार्थलाई फिल्मले कथानक रूपमा प्रस्तुत गरेको छ ।
नेपाली समुदायभन्दा अन्य भाषी दर्शकहरूले बढी रुचाएका कारण नेपाली कथावस्तुको अन्तर्राष्ट्रिय सम्भावना उजागर गर्नुका साथै आफ्नै समुदायभित्र भाषिक र सांस्कृतिक चेतनाको आवश्यकतालाई समेत संकेत गरेको छ ।
