दमक, असार १०। दमक नगरपालिकाले आगामी आर्थिक वर्ष २०८३/०८४ का लागि एक अर्ब ५८ करोड ६९ लाख रुपैयाँको बजेट सार्वजनिक गरेको छ।
नगरपालिकाको १९ औँ नगरसभामा उपप्रमुख रेगिना भट्टराई प्रसाईले बजेट प्रस्तुत गर्नुभएको हो। नगर प्रमुख रामकुमार थापाको अध्यक्षतामा नगरसभा जारी रहेको छ।
प्रस्तावित बजेटमध्ये चालु खर्चतर्फ ८५ करोड ८१ लाख ५९ हजार रुपैयाँ अर्थात् ५४ प्रतिशत विनियोजन गरिएको छ।
यस्तै, पूँजीगत खर्चतर्फ ६८ करोड २२ लाख ४१ हजार रुपैयाँ अर्थात् ४३ दशमलव १ प्रतिशत र वित्तीय व्यवस्थातर्फ ४ करोड ६५ लाख रुपैयाँ अर्थात् २ दशमलव ९ प्रतिशत बजेट छुट्याइएको छ।
बजेट कार्यान्वयनका लागि नगरपालिकाले आन्तरिक आम्दानीबाट ४४ करोड ३८ लाख ५५ हजार रुपैयाँ जुटाउने लक्ष्य राखेको छ। संघीय सरकारबाट ५८ करोड ९६ लाख रुपैयाँ तथा प्रदेश सरकारबाट ४ करोड ९४ लाख १८ हजार रुपैयाँ अनुदान प्राप्त हुने अनुमान गरिएको छ।
त्यस्तै, राजस्व बाँडफाँडमार्फत ३३ करोड ३४ लाख १७ हजार रुपैयाँ र जनसहभागिताबाट १ करोड रुपैयाँ जुटाइने प्रस्ताव गरिएको छ।
नगरपालिकाले पूर्वाधार विकास, सेवा प्रवाहको प्रभावकारिता, आर्थिक गतिविधि विस्तार तथा स्थानीय आवश्यकतालाई प्राथमिकतामा राखेर बजेट विनियोजन गरेको जनाएको छ।
