कोशी,१४ असोज ।कोशी प्रदेशमा युवालाई स्वदेशमै रोजगारीसँग जोड्ने उद्देश्यले ‘सीप तथा रोजगार मेला–२०८३’ बुधबारदेखि इटहरीमा सुरु भएको छ।
युवा, श्रम तथा रोजगार मन्त्रालयको आयोजनामा इटहरीस्थित सोल्टी वेस्टइन्ड होटल परिसरमा सुरु भएको मेला असोज २० गतेसम्म सात दिन सञ्चालन हुनेछ। मेलाको मूल नारा ‘सीप र रोजगारी स् साझा जिम्मेवारी’ रहेको छ।
मेलामा विभिन्न उद्योग, व्यापारिक प्रतिष्ठान तथा रोजगारदाताका ६५ वटा स्टल राखिएका छन्। रोजगारी खोजिरहेका युवाले मेलास्थलमै पुगेर रोजगारदाता तथा सीपसम्बन्धी परामर्श लिन सक्ने व्यवस्था गरिएको छ।
मन्त्रालयका अनुसार हालसम्म विभिन्न उद्योग तथा प्रतिष्ठानले ६ हजारभन्दा बढी कामदार तथा कर्मचारीको माग गरेका छन्। त्यस्तै, रोजगारी र सीपमूलक तालिमका लागि ५ हजारभन्दा बढी युवा सूचीकृत भइसकेका छन्। माग भएका रोजगारीमध्ये ८० देखि ९० प्रतिशत अवसर कोशी प्रदेशकै उद्योग तथा व्यवसायसँग सम्बन्धित रहेको जनाइएको छ।
मेलामा उद्योग, सेवा, कृषि र निर्माणलगायत विभिन्न १० क्षेत्रमा रोजगारी तथा सीपका अवसर समेटिएका छन्। बारिस्टा, कुक तथा वेटर, आधारभूत लेखा, एसी मर्मत, विद्युतीय सवारी मर्मत, मेकअप तथा नेल आर्ट, अचार बनाउनेलगायत तालिमसमेत सञ्चालन हुनेछन्।
पछिल्लो समय युवाको आकर्षण बढिरहेको एआई र डिजिटल मार्केटिङलाई समेत मेलामा प्राथमिकता दिइएको छ। एक हजारभन्दा बढी युवालाई एआईसम्बन्धी अभिमुखीकरण दिने तथा छनोट भएका समूहलाई गहन तालिम दिने तयारी गरिएको छ।
सरकारले रोजगारदाता र रोजगारी खोजिरहेका युवाबीचको दूरी घटाउँदै सीप भएका जनशक्तिलाई मागअनुसारको कामसँग जोड्ने उद्देश्यले मेलालाई राष्ट्रिय अभियानका रूपमा अघि बढाएको जनाएको छ।
मेलाबाट रोजगारी खोजिरहेका युवाले प्रत्यक्ष रूपमा रोजगारदाता भेट्ने, आफ्नो सीपबारे जानकारी दिने तथा आवश्यक सीप र तालिमबारे परामर्श लिने अवसर पाउनेछन्।
