दमक/
दमक २ की गोमा घिमिरे । उहाँ विभिन्न कपडा काटेर सिलाई गर्न जान्ने हुनुन्छ । तर उहाँलाई अझै हाते झोला बनाउन मन लाग्यो । त्यहि भएर दमक वडा नं २ को कार्यालयले आयोजना गरेको तालिममा झोला सिलाउने तालिममा सहभागी हुनु भएको छ । उहाँले तालिम लिएको एक महिना पुरा भइसक्यो । अझै १० दिन सम्म उहाँले यो तालिम लिनु हुने छ ।
अहिलेनै उहाँ हाते झोला जत्रो र जस्तो पनि सिलाउन जान्ने हुनु भएको छ । बजारमा यस प्रकारको झोला निकै राम्रो मुल्यमा बिक्रि भएको उहाँले देख्नु भएको छ । त्यसैले अव उहाँले पनि आफ्नै उत्पादनको हाते झोला दमकको बजारमा चाँडै ल्याउदै हुनुहुन्छ । झोला सिलाएर बिक्रि गरेर उहाँले आफ्नो घरको दैनिक खर्च टार्ने र श्रीमानले कमाउनु भएको कमाई बचत गर्ने योजनामा हुनुहुन्छ ।
यही ठाउँकी माया कोइराला पनि झोला सिउने सिप सिकिरहनु भएको छ । उहाँको घरमा झोला सिउने मेसिन पनि छ । त्यसैले उहाँ तालिम लिने ठाउमा सिकेका सिपलाई घरमा भएर पनि अभ्यास गर्नु हुन्छ । १० प्रकारका हाते झोला बनाउन उहाँले सिकिसक्नु भएको छ । यतीमात्रै उत्पादन गरेर बजारमा लैजादा पनि कमाई हुन सक्ने उहाँको विस्वास छ । तर बजार प्रतिस्पर्धी भएकोले अहिले सिकेकोले मात्र आफुहरुलाई पर्याप्त नहुने र अझ यस सम्बन्धीको बृहत तालीम भए बजारमा प्रतिस्पर्धा गर्न सहज हुने कोईरालाको भनाई छ ।
कपडा हालेर बोक्न मिल्ने जेब्रा झोला,महिलाहरुले हातमा बोक्ने विभिन्न आकार र प्रकारका हाते पर्स, तरकारी बोक्ने कपडाको झोला लगायतका झोलाहरु बनाउन यहाँका २० जना महिलाहरुले सिक्नु भएको छ । महिलाहरुलाई आत्मनिर्भर बनाउन र स्वरोजगार बनाउन सिटिइभिटी लेभलका विभिन्न सिपमुलक तालिमहरु महिलाहरुलाई प्रदान गर्दै आएको तालिम प्रादायक सस्था भूमिका सिपमुलक तालिम केन्द्रकी सञ्चालीका भूमिका दाहाल पोखरेलेले बतउनु भयो ।
वडाले महिला लक्षीत कार्यक्रम मात्रै दर्जनौ गरेको छ । हरेक वर्ष सिप सिकार महिलाहरुलाई सिपयूक्त बनाउँदै महिलाहरुलाई रोजगार र स्वरोजगारमा वडा कार्यालयले उन्मुख गराइरहेको छ । सामान्य खर्च माग्न पनि श्रीमान वा परिवारका अभिभावकसँग मागीरहन नपरोस भनेर वडाले यस प्रकारको तालिमहरु सञ्चालन गरेको वडाध्यक्ष प्रजापति सापकोटाले बतउनु भयो ।
यो तालिम वडाको वार्षिक कार्यक्रम अन्तगर्त भएको हो । २ लाख रुपैँया हुँदै गरेको तालिम सुरुमा एक महिना मात्रै गर्ने भनिएको थियो ।तर सिक्ने कुरा नसकिएपछि तालिम थप १० दिन थपेर ४० दिन पुर्याइएको छ ।
झापाको दमकका महिलाहरुलाई विभिन्न प्रकारका तालीमहरु दिइरहिएको छ । आवश्यकता र मागका आधारमा नगरपालिकाले वडा स्तरमै कार्यक्रम सञ्चालन गरिरहेको छ । लक्षीत वर्गसम्म कार्यक्रमको पहुँच पुगोस भनेर कार्यक्रमलाई वडा स्तरमा बिस्तार गरिएको हो । दमकमा ‘दमकका महिला उद्यममा पहिला’भन्ने कार्यक्रम जनप्रतिनिधी आएदेखीनै सञ्चालन हुँदै आएको छ ।
