काँकडभिट्टा ,२३ असार । गृहमन्त्री सुदन गुरुङले झापाको काँकडभिट्टा सीमा नाका र मेची भन्सार कार्यालयको निरीक्षणका क्रममा तस्करीबारे गुनासो सुनेपछि दुई डीएसपीसहित ११ जना प्रहरी अनुसन्धानको दायरामा परेका छन्।
अनुसन्धानका लागि इलाका प्रहरी कार्यालय काँकडभिट्टाका डीएसपी निशेष चापागाईं, सशस्त्र प्रहरीको बोर्डर आउट पोस्ट ९बीओपी० काँकडभिट्टाका डीएसपी विकास थापासहित नेपाल प्रहरीका ५ र सशस्त्र प्रहरीका ६ जनाको मोबाइल नियन्त्रणमा लिइएको छ।
झापाका विभिन्न नाकाबाट तस्करीको लाइन सञ्चालन भएको आरोपपछि उनीहरूमाथि आन्तरिक छानबिन सुरु गरिएको हो। अनुसन्धानमा केही सादा पोसाकका प्रहरीसमेत तानिएका छन्।
यसअघि सशस्त्र प्रहरी बलले झापाका तीन जना घुमुवा प्रहरीलाई काठमाडौं झिकाएर अनुसन्धान थालेको थियो। तस्करीमा संलग्न समूहसँग मिलेमतो गरी आर्थिक लाभ लिएको उजुरीपछि उनीहरूमाथि छानबिन भइरहेको सशस्त्र प्रहरी मुख्यालयले जनाएको छ।
गृहमन्त्री गुरुङको काँकडभिट्टा निरीक्षणका क्रममा स्थानीय महिला बन्दना मेचेले प्रहरीकै मिलेमतोमा रातको समयमा तस्करी हुने गरेको गुनासो गरेकी थिइन्। उनले सीमा क्षेत्रमा विभिन्न व्यक्तिको ‘लाइन’ चल्ने गरेको दाबी गरेपछि गृहमन्त्रीले सम्बन्धित सुरक्षा अधिकारीहरूलाई बोलाएर जानकारी लिएका थिए।
कोशी प्रदेश प्रहरी कार्यालयका डीआईजी विनोद घिमिरेले प्राप्त गुनासोका आधारमा थप अनुसन्धान भइरहेको बताए। जिल्ला प्रहरी कार्यालय झापाले पनि घटनाबारे आन्तरिक छानबिन भइरहेको जनाएको छ।
यता, डीएसपी निशेष चापागाईंले भने गृहमन्त्रीले आफ्नो मोबाइल नियन्त्रणमा लिएको दाबी अस्वीकार गर्नु भएको छ ।
