काठमाडौं,१ भदौं। नेपालभर नाग पञ्चमी पर्व श्रद्धा र भक्तिभावका साथ मनाइँदै गर्दा नेपालमा रहेका ब्रिटिश गोर्खाले पनि नागपञ्चमी मनाएका छन् ।
ब्रिटिश गोर्खाज नेपाल (बीजीएन)को मन्दिर परिसरमा आज विशेष पूजा आयोजना गरि नागपञ्चमी मनाइएको हो ।
पूजाको नेतृत्व बीजीएनका गोर्खा मेजर मेजर किरण पुन एमभीओ र बीजीएन पण्डित झबिन्द्र घिमिरेले गरेका थिए । पूजामा बीजीएनका अधिकृत तथा कर्मचारीहरूको सहभागिता रहेको थियो । हिन्दू धार्मिक मान्यताअनुसार नाग अर्थात् सर्प देवताको पूजा गर्दा घरपरिवारको सुरक्षा, सुख–शान्ति तथा कल्याण हुने विश्वास गरिन्छ ।
नाग पञ्चमी धार्मिक पर्वसँगै पर्यावरणीय महत्व बोकेको पर्वका रूपमा समेत लिइन्छ । नाग भगवान अर्थात सर्पप्रति श्रद्धा र सम्मान व्यक्त गर्ने लामो समयदेखिको परम्परालाई यस पर्वले निरन्तरता दिएको छ ।
बीजीएनले सामाजिक सञ्जाल फेसबुक मार्फत नाग पञ्चमीको अवसरमा मन्दिरमा पूजा गरिएको जानकारी दिँदै पूजामा सहभागी अधिकृत तथा कर्मचारीहरूको तस्बिरसमेत सार्वजनिक गरेको छ । तस्विर स्रोत ब्रिटिस गोर्खाज नेपाल फेसबुक पेज
