काठमान्डौ,९ भदौ । नेपाली कांग्रेसको १५औँ महाधिवेशन रोक्न माग गर्दै निवर्तमान सभापति शेरबहादुर देउवा र निवर्तमान कार्यवाहक सभापति पूर्णबहादुर खड्काले दायर गरेका छुट्टाछुट्टै पुरक निवेदन सर्वोच्च अदालतमा दर्ता भएका छन्।
देउवाका वारेस कांग्रेस नेता दीपक खड्का र खड्काका वारेस अधिवक्ता श्रवणकुमारले सोमबार पेस गरेका पुरक निवेदन सर्वोच्च अदालतले मंगलबार दर्ता गरेको हो। दुवै निवेदनमाथि आगामी ११ भदौ बिहीबारका लागि पेसी तोकिएको छ।
देउवा र खड्काले दायर गरेको निवेदनमा विशेष महाधिवेशनबाट आएको भनिएको नेतृत्वले एकलौटी रूपमा अघि बढाएको १५औँ महाधिवेशनको प्रक्रिया रोक्न माग गरिएको छ।
यसअघि सर्वोच्च अदालतले कांग्रेसको विशेष महाधिवेशनसम्बन्धी विवादमा पुनरावलोकनका लागि निस्सा दिएपछि उक्त विवाद सर्वोच्च अदालतमा विचाराधीन छ। सर्वोच्चमा नयाँ पुरक निवेदन दर्ता भएसँगै कांग्रेसको आन्तरिक विवाद थप कानुनी प्रक्रियातर्फ अघि बढेको छ।
