बिर्तामोड,१० भदौ । झापाको बिर्तामोड नगरपालिका–९ मा न्वारानको भोज खाएका ठूलो संख्याका स्थानीय बिरामी परेका छन्। स्थानीय रामकुमार श्रेष्ठको नातिनीको न्वारान भोजमा सहभागी भएका पाहुनाहरूमा पेट दुख्ने, वान्ता हुने र झाडापखालाको समस्या देखिएपछि १२ जनालाई अस्पताल भर्ना गरिएको छ।
करिब ५० जना सहभागी उक्त भोजपछि स्वास्थ्य समस्या देखिएकामध्ये ८ जनालाई बिर्तामोड नगर अस्पताल र ४ जनालाई प्रादेशिक अस्पताल भद्रपुरमा भर्ना गरिएको थियो। बिरामी पर्नेहरूमा घरधनी ५३ वर्षीय रामकुमार श्रेष्ठ, उहाँकी श्रीमती तारा श्रेष्ठसहित परिवार र आफन्तहरू रहेका छन्। उपचारपछि अधिकांश डिस्चार्ज भइसकेका छन् भने केही स्थानीयले फार्मेसीबाट औषधि सेवन गरिरहेका छन्।
मासु र तेलको नमुना परीक्षण गरिँदै
भोजमा प्रयोग गरिएको कुखुराको मासुका कारण ‘फुड प्वाइजनिङ’ खाद्य विषाक्तता भएको आशंका गरिए पनि आधिकारिक पुष्टि भने हुन बाँकी छ। घटनापछि खाद्य प्रविधि तथा गुण नियन्त्रण कार्यालय झापा र बिर्तामोड नगरपालिकाको संयुक्त टोलीले बिर्ताबजारस्थित गणेश फ्रेस हाउसबाट मासु र हल्दीबारीको एक किराना पसलबाट खाना पकाउने तेलको नमुना संकलन गरेको छ।संकलित नमुनाको प्रयोगशाला परीक्षण प्रतिवेदन आएपछि मात्र बिरामी पर्नुको वास्तविक कारण यकिन हुने खाद्य प्रविधि तथा गुण नियन्त्रण कार्यालयले जनाएको छ।
फ्रेस हाउसलाई सुधार गर्न ३ दिनको अल्टिमेटम
घटना सार्वजनिक भएलगत्तै गरिएको अनुगमनका क्रममा बिर्ताबजार स्थित गणेश फ्रेस हाउसमा न्यूनतम सरसफाइ समेत नभएको पाइएको छ।बिर्तामोड नगरपालिकाका उपप्रमुख नगेन्द्रप्रसाद संग्रौलाका अनुसार फ्रेस हाउसको सरसफाइ र भण्डारण सुधार गर्न सञ्चालक गणेश श्रेष्ठलाई ३ दिनको म्याद दिइएको छ। तोकिएको समयमा मापदण्ड पूरा नगरे पसलविरुद्ध कानुनी कारबाही अगाडि बढाइने नगरपालिकाले चेतावनी दिएको छ। हाल अस्पतालमा उपचाररत बिरामीहरूको अवस्था सामान्य रहेको छ।
