काठमाडौ , १० भदौ । रसुवामा बुधबार बिहान एक्कासि आएको भीषण बाढीको कारण अझै खुल्न सकेको छैन। मंगलबार राति वा बुधबार बिहान रसुवा लगायतका क्षेत्रमा ठूलो वर्षा नभएको र अधिकांश खोला तथा नदीको बहाव सामान्य अवस्थामै रहेका बेला बिहान करिब ९ बजे अप्रत्याशित रूपमा भोटेकोशी नदीमा ठूलो बाढी आएको हो।बाढी चीनतर्फबाट भोटेकोशी नदीमा प्रवेश गरेको प्रारम्भिक विवरणपछि यसको कारणबारे नेपालले चीनसँग समन्वय थालेको छ। सुरक्षा निकायका अनुसार बाढी आउनुको वास्तविक कारण अझै यकिन हुन सकेको छैन। अचानक आएको बाढीले नेपाली भूभागमा ठूलो क्षति पुर्याएको छ। बाढीको कारण भएको क्षतिको विवरण संकलन तथा उद्धार र राहतका लागि सुरक्षा निकाय परिचालन गरिएको छ।
यसैबीच, रसुवामा बाढी तथा पहिरोबाट उत्पन्न संकटबारे गृह मन्त्रालयमा विपद् जोखिम न्यूनीकरण तथा व्यवस्थापन प्राधिकरणको बैठक बसेको छ। बैठकमा बाढीको अवस्था, क्षतिको विवरण, उद्धार तथा राहतका विषयमा छलफल भइरहेको छ। यता, प्रधानमन्त्री बालेन्द्र शाहलाई नेपाली सेनाले रसुवामा बाढीबाट अहिलेसम्म भएको क्षतिबारे ब्रिफिङ गरेको छ। सरकारले उद्धार तथा राहतलाई प्राथमिकता दिँदै घटनाको कारण पत्ता लगाउने प्रयाससमेत अघि बढाएको छ।अचानक यति ठूलो बाढी आउनुको कारणबारे प्रारम्भिक रूपमा हिमताल फुटेको हुनसक्ने अनुमान गरिएको छ। हिमपहिरोका कारण नदी थुनिएर केही समयपछि एक्कासि बाँध फुटेजस्तो अवस्थामा ठूलो पानीको बहाव आएको हुनसक्ने प्रारम्भिक निष्कर्ष सुरक्षा निकायको छ।तर हिमताल फुटेको हो वा अन्य कुनै कारणले एक्कासि भोटेकोशीमा ठूलो बाढी आएको हो भन्ने विषयमा थप अध्ययन र सूचनाको आवश्यकता रहेको बताइएको छ।
विशेषगरी बाढीको स्रोत चीनतर्फ हुनसक्ने देखिएपछि घटनाको वास्तविक कारण र अवस्थाबारे चीनसँग समन्वय गरी थप विवरण लिने प्रयास भइरहेको सुरक्षा निकायले जनाएको छ।अहिले मुख्य प्राथमिकता उद्धार र राहत भए पनि रसुवामा सामान्य मौसम र नदीको बहाव हुँदाहुँदै एक्कासि आएको विनाशकारी बाढीको कारण के हो रु भन्ने प्रश्नको जवाफ खोज्न नेपालले सम्बन्धित निकायमार्फत अनुसन्धान र समन्वय अघि बढाएको छ।
