रसुवा |१० भदौ | भोटेकोशी नदीमा आएको बाढीपछि रसुवाका विभिन्न क्षेत्रमा फसेका बाढीपीडितको उद्धार धमाधम भइरहेको नेपाली सेनाले जनाएको छ। सेनाका अनुसार हालसम्म हेलिकोप्टरमार्फत १२ जनाको उद्धार गरिएको छ।
नेपाली सेनाका अनुसार स्याफ्रुबेँसीबाट ६ जना, मैलुङबाट २ जना र धुन्चेबाट ४ जनाको उद्धार गरिएको हो।
बाढी प्रभावित क्षेत्रमा उद्धार कार्यलाई तीव्रता दिन नेपाली सेनाका चार तथा निजी कम्पनीका आठ गरी १२ वटा हेलिकोप्टर परिचालन गरिएको सेनाले जनाएको छ।
यसैबीच, नेपाली सेनाको मेडिकल टिमले त्रिशूलीस्थित नं. १ सैन्य तालिम केन्द्रमा आकस्मिक उपचार सेवा पनि सञ्चालन गरिरहेको छ। उद्धार गरिएका तथा उपचार आवश्यक पर्ने प्रभावितलाई सोही स्थानबाट प्राथमिक उपचार सेवा उपलब्ध गराइँदै आएको सेनाले जनाएको छ।
भोटेकोशी नदीमा आएको बाढीका कारण रसुवाका विभिन्न क्षेत्रमा जनजीवन प्रभावित भएपछि सुरक्षा निकायले उद्धार तथा राहत कार्यलाई निरन्तरता दिइरहेका छन्।
