काठमाडौं, १० भदौ । चीनतर्फबाट प्राप्त पछिल्लो सूचनाअनुसार भोटेकोसी नदी थुनिएको स्थानमा बनेको ताल अझै पूर्ण रूपमा नखुलेपछि भोटेकोसी र त्रिशूली नदी आसपासको जोखिम कायमै रहेको छ ।
जल तथा मौसम विज्ञान विभागले बुधबार दिउँसो १ः३० बजे चीनतर्फबाट प्राप्त सूचनाका आधारमा नदी आसपासका बासिन्दालाई थप सतर्क रहन आग्रह गरेको हो ।
विभागका अनुसार नदी थुनिएको स्थानमा ताल पूर्ण रूपमा नखुलेका कारण जुनसुकै बेला पानीको बहावमा परिवर्तन आउन सक्ने जोखिम रहेको छ । त्यसैले अर्को सूचना जारी नभएसम्म भोटेकोसी र त्रिशूली नदीबाट टाढा सुरक्षित स्थानमा रहन विभागले सबैमा अनुरोध गरेको छ ।
विभागले नदी किनार, तटीय क्षेत्र तथा जोखिमयुक्त स्थानमा रहेका नागरिकलाई विशेष सावधानी अपनाउन आग्रह गरेको छ ।
