काठमाडौँ,१० भदौ । रसुवाको भोटेकोशी नदीमा आएको बाढीबाट प्रभावित नागरिकका लागि विश्व स्वास्थ्य संगठन (डब्ल्युएचओ)ले आवश्यक स्वास्थ्य तथा राहत सामग्री पठाउने भएको छ।प्रधानमन्त्री बालेन्द्र शाहको सचिवालयका अनुसार स्वास्थ्य तथा खाद्य स्वच्छतामन्त्री निशा मेहतासँगको समन्वय पछि डब्ल्युएचओले एक हजार जनालाई पुग्ने आधारभूत औषधि तथा स्वास्थ्य उपकरण प्रभावित क्षेत्रमा पठाउन लागेको हो।त्यस्तै, डब्ल्युएचओले २४ स्क्वायर मिटर क्षेत्रफलका १५ वटा आपतकालीन टेन्ट समेत प्रभावित क्षेत्रमा पठाउने तयारी गरेको स्वास्थ्य मन्त्रालयले जनाएको छ।
बाढी प्रभावितको उपचारका लागि काठमाडौं स्थित वीर अस्पताल र राष्ट्रिय ट्रमा सेन्टरमा १०० वटा आपतकालीन शय्या छुट्याइएको मन्त्रालयले जनाएको छ। बाढीमा घाइते भएका तीन जनालाई उद्धार गरी उपचारका लागि काठमाडौं ल्याइसकिएको पनि मन्त्रालयको भनाइ छ।स्वास्थ्य सेवाको आपतकालीन व्यवस्थापनका लागि काठमाडौं स्थित संघीय अस्पताल, रक्तसञ्चार केन्द्र, बागमती तथा गण्डकी प्रदेशका स्वास्थ्य मन्त्रालयसँग समन्वय भइरहेको छ।
त्यस्तै, नेपाल रेडक्रस, लायन्स र नेपाल स्काउटसँग समेत प्रभावित क्षेत्रमा आवश्यक स्वास्थ्य तथा राहत सेवा पु¥याउन समन्वय भइरहेको मन्त्रालयले जनाएको छ।
यसैबीच, राष्ट्रिय ट्रमा सेन्टरबाट चिकित्सकको टोलीसमेत बाढी प्रभावित क्षेत्रमा पठाइएको छ। सेन्टरका अनुसार सात जना चिकित्सकलाई आवश्यक औषधिसहित प्रभावित क्षेत्रतर्फ पठाइएको हो।
विपद्को अवस्थामा स्वास्थ्य आपतकालीन व्यवस्थापनका लागि स्वास्थ्य आपतकालीन सञ्चालन केन्द्रले विभिन्न निकायबीच समन्वय गर्ने भूमिका निर्वाह गर्दै आएको छ।
