काठमान्डौ,१० भदौ। रसुवाको टिमुरेस्थित भन्सार कार्यालय बाढीले पूर्णरूपमा क्षतिग्रस्त भएको छ।
बुधबार बिहान तिब्बततर्फबाट आएको भीषण बाढीले भन्सार कार्यालयसहित आसपासका संरचनामा ठूलो क्षति पुर्याएको भन्सार विभागका महानिर्देशक यमलाल भूसालले जानकारी दिनुभयो ।
महानिर्देशक भूसालका अनुसार रसुवा भन्सार कार्यालयमा ३७ जनाको दरबन्दी रहेकोमा हालसम्म १७ जना कर्मचारी मात्र सम्पर्कमा आएका छन्। सम्पर्कविहीन कर्मचारीहरूसँग सम्पर्क स्थापित गर्ने प्रयास भइरहेको उहाँले बताउनु भयो।
‘बाढीले धनसम्पत्तिमा ठूलो क्षति गरेको छ। सम्पर्कविहीन कर्मचारीहरूसँग सम्पर्क स्थापित गर्ने प्रयास भइरहेको छ। फोनमार्फत वस्तुस्थितिबारे जानकारी लिने काम जारी रहेकाले क्षतिको पूर्ण विवरण आउन बाँकी छ,’ उहाँले बताउनु भयो।
भूसालका अनुसार अहिलेको मुख्य प्राथमिकता कर्मचारीहरूको सुरक्षा सुनिश्चित गर्नु र बाढीबाट भएको वास्तविक क्षतिको विवरण संकलन गर्नु हो।
प्रारम्भिक विवरणअनुसार बाढीले टिमुरे क्षेत्रका ठूला पुलसमेत बगाएको छ। हालै मर्मत गरिएका संरचना तथा अन्य भौतिक सम्पत्तिमा भएको क्षतिको यकिन विवरण संकलन हुन बाँकी रहेको भन्सार विभागले जनाएको छ।
