काठमान्डौ,१० भदौ । रसुवाको भोटेकोशी नदीमा बुधबार बिहान आएको आकस्मिक बाढीपछि २९१ विदेशी नागरिकसहित ३८४ जना यात्रु सम्पर्कविहीन भएको प्रारम्भिक विवरण सार्वजनिक भएको छ ।
नेपाल पर्यटन बोर्डले बुधबार सार्वजनिक गरेको ‘भोटेकोशी आकस्मिक बाढी अवस्था अद्यावधिक–२’ अनुसार प्रभावित क्षेत्रमा रहेका तथा यात्रा गरिरहेका पर्यटक र यात्रुको अवस्था पहिचान तथा पुष्टि गर्ने काम भइरहेको छ ।
पर्यटन तथा ट्राभल कम्पनीबाट प्राप्त प्रारम्भिक विवरणअनुसार सम्पर्कविहीनमध्ये २९१ जना विदेशी र ९३ जना नेपाली नागरिक छन् । बोर्ड, पर्यटक प्रहरी तथा पर्यटन क्षेत्रका सम्बन्धित निकायले ट्राभल एजेन्सी, पथप्रदर्शक, स्थानीय प्रशासन तथा सुरक्षा निकायसँग समन्वय गरी विवरणको प्रमाणीकरण तथा पुनःपुष्टि गरिरहेको जनाएको छ ।
प्रारम्भिक विवरणअनुसार सम्राट टुर्स एन्ड ट्राभल्सका ७१ जना यात्रु सम्पर्कविहीन छन् । तीमध्ये ५९ जना भारतीय नागरिक र १२ जना नेपाली छन् ।
त्यस्तै, काठमाडौं होलिडे टुर्स एन्ड ट्राभल्सका १७ जनामध्ये दुई जना विदेशी नागरिक ९एक अस्ट्रेलियाली र एक नेदरल्यान्ड्सका० तथा १५ जना नेपाली नागरिक छन् ।
लिफ होलिडेका ५५ जनामध्ये ४६ जना भारतीय र नौ जना नेपाली, कैलाश जर्नीका ३१ जनामध्ये २६ जना विदेशी नागरिक ९राष्ट्रियता पुष्टि हुन बाँकी० र पाँच जना नेपाली रहेको बोर्डले जनाएको छ ।
एक्सप्लोर भ्याकेसनका सात जना यात्रु सम्पर्कविहीन भएको विवरणमा उल्लेख छ । ट्रेकर्स सोसाइटीका ९२ जनामध्ये ७७ जना विदेशी नागरिक ९राष्ट्रियता पुष्टि हुन बाँकी० र १५ जना नेपाली छन् ।
त्यस्तै, रिचा टुर्स एन्ड ट्राभल्सका १२ जनामध्ये आठ जना विदेशी नागरिक र चार जना नेपाली, फिस्टेल टुर्स एन्ड ट्राभल्सका २७ जनामध्ये २० जना विदेशी तथा सात जना नेपाली नागरिक रहेको प्रारम्भिक विवरणमा उल्लेख छ ।
हिमालयन ग्लेसियरका ५२ जनामध्ये ३७ जना विदेशी नागरिक र १५ जना नेपाली तथा अल्पाइन इको ट्रेकका २० जनामध्ये १६ जना विदेशी र चार जना नेपाली नागरिक सम्पर्कविहीन रहेको बोर्डले जनाएको छ ।
बोर्डका अनुसार हिमालयन ग्लेसियरमा सम्पर्कविहीन देखिएका ३७ जनामध्ये केही भारतीय मूलका नागरिक रहेको र अल्पाइन इको ट्रेकका १६ विदेशीमध्ये १२ जना बेलायती तथा चार जना दक्षिण अफ्रिकी नागरिक रहेको प्रारम्भिक विवरण छ ।
नेपाल पर्यटन बोर्डले यो विवरण प्रारम्भिक रहेको र सम्बन्धित निकायसँग समन्वय गरी निरन्तर अद्यावधिक तथा प्रमाणीकरण भइरहेको जनाएको छ ।
बाढी प्रभावित क्षेत्रमा रहेका पर्यटक तथा यात्रुलाई शान्त रहन, आधिकारिक सूचना मात्र पछ्याउन र सुरक्षा निकायको निर्देशन पालना गर्न बोर्डले आग्रह गरेको छ ।
आपत्कालीन अवस्थाका लागि निःशुल्क आपत्कालीन नम्बर १२३४, हटलाइन ११४४ तथा पर्यटक प्रहरीको नम्बर ९८५१२८९४४५ मा सम्पर्क गर्न सकिने बोर्डले जनाएको छ ।
सम्बन्धित व्यक्तिले नजिकको प्रहरी वा सुरक्षा निकाय, स्थानीय प्रशासन, यात्रा कम्पनी, पथप्रदर्शक वा भ्रमण सञ्चालकसँग समेत सम्पर्क गर्न सक्ने बोर्डले जनाएको छ ।
