काठमाडौं ,१८ असोज। चाडपर्व, विपद् वा आपत्कालीन अवस्थाको मौका छोपेर यात्रुसँग स्वीकृतभन्दा बढी हवाई भाडा लिने वायुसेवा कम्पनीलाई १५ लाख रुपैयाँसम्म जरिवाना गर्ने व्यवस्था प्रस्ताव गरिएको छ ।
नेपाल नागरिक उड्डयन प्राधिकरणसम्बन्धी कानुन संशोधन तथा एकीकरण गर्न बनेको विधेयकमा स्वीकृत भाडादरभन्दा बढी रकम लिएर उडान सञ्चालन गर्नुलाई कसुर मान्ने प्रस्ताव गरिएको हो ।
विधेयकको दफा ४७ मा स्वीकृत भाडादरभन्दा बढी हवाई भाडा लिएर उडान सञ्चालन गर्ने कार्यलाई कसुरका रूपमा राखिएको छ । यस्तो कसुर गर्ने वायुसेवा सञ्चालक वा सम्बन्धित व्यक्तिलाई ५ लाखदेखि १५ लाख रुपैयाँसम्म जरिवाना गर्न सकिने व्यवस्था दफा ४८ मा प्रस्ताव गरिएको छ ।
जरिवाना गर्ने अधिकार नेपाल नागरिक उड्डयन प्राधिकरणका महानिर्देशकलाई दिने प्रस्ताव छ ।
यति मात्र होइन, एकपटक कारबाहीमा परिसकेपछि पनि उही प्रकृतिको कसुर दोहोर्याएमा अघिल्लो पटक तोकिएको जरिवानाको दोब्बर रकम जरिवाना गर्न सकिने व्यवस्था प्रस्ताव गरिएको छ ।
विशेषगरी दसैं, तिहार र छठजस्ता चाडपर्वका बेला हवाई टिकटको माग बढ्छ । बाढी, पहिरो, सडक अवरोध वा अन्य विपद्का कारण स्थलमार्ग बन्द हुँदा पनि यात्रु हवाई सेवातर्फ निर्भर हुने गर्छन् । यही समयमा स्वीकृतभन्दा बढी भाडा लिने गुनासो आउने गरेको भन्दै यस्तो कानुनी व्यवस्था प्रस्ताव गरिएको हो ।
कानुन लागू भएमा वायुसेवा कम्पनीले नेपाल नागरिक उड्डयन प्राधिकरणबाट स्वीकृत भएको भाडादरभन्दा बढी रकम यात्रुसँग लिन पाउने छैनन् ।
संस्कृति, पर्यटन तथा नागरिक उड्डयन मन्त्रालयले विधेयकको मस्यौदामाथि सरोकारवालाबाट सुझावसमेत मागिसकेको छ । मन्त्रालयले २०८३ असार २४ गते सुझाव संकलनसम्बन्धी सूचना प्रकाशित गरेको थियो ।
तर, यो व्यवस्था अहिले प्रस्तावित मात्रै हो । विधेयक संसद्बाट पारित भएर कानुन बनेपछि मात्रै कार्यान्वयनमा आउनेछ । संसद्मा छलफलका क्रममा यसका प्रावधान संशोधन हुन सक्नेछन् ।
