झापा,१ असोज । झापामा चालु आर्थिक वर्ष २०८३र८४ को असोज महिनामा सवारी दुर्घटना र त्यसबाट हुने मानवीय क्षति अघिल्ला दुई महिनाको तुलनामा बढेको छ ।
जिल्ला ट्राफिक प्रहरी कार्यालय बिर्तामोडको तथ्याङ्कअनुसार साउन, भदौ र असोजमा कुल ३३८ सवारी दुर्घटना भएका छन् । ती दुर्घटनामा ३१ जनाको मृत्यु भएको छ भने २७ जना गम्भीर र ४९७ जना सामान्य घाइते भएका छन् ।
तथ्याङ्कअनुसार साउनमा १५, भदौमा ८८ र असोजमा १५५ सवारी दुर्घटना भएका छन् । यसअनुसार असोजमा भदौको तुलनामा ६७ बढी दुर्घटना भएका छन् । साउनको तुलनामा असोजमा दुर्घटनाको संख्या उल्लेख्य रूपमा बढेको देखिन्छ ।
दुर्घटनामा संलग्न सवारीसाधनको संख्या पनि असोजमा बढी छ । साउनमा १४२, भदौमा १३७ र असोजमा २२३ सवारीसाधन दुर्घटनामा संलग्न भएका छन् ।
मानवीय क्षतितर्फ साउनमा १४, भदौमा चार र असोजमा १३ जनाको मृत्यु भएको तथ्याङ्कमा उल्लेख छ । त्यस्तै, साउनमा नौ, भदौमा सात र असोजमा ११ जना गम्भीर घाइते भएका छन् । सामान्य घाइते हुनेको संख्या साउनमा १३३, भदौमा १२८ र असोजमा २३६ रहेको छ ।
यसले असोज महिनामा दुर्घटनासँगै घाइते हुनेको संख्यामा समेत वृद्धि भएको देखाउँछ । यद्यपि, दुर्घटना बढ्नुका कारण पहिचान गर्न दुर्घटना भएका स्थान, सवारीसाधनको अवस्था, चालकको लापरबाही, सडकको अवस्था र ट्राफिक नियम पालनासम्बन्धी विवरणको थप विश्लेषण आवश्यक देखिन्छ ।
जिल्ला ट्राफिक प्रहरी कार्यालय बिर्तामोडका प्रमुख प्रहरी निरीक्षक सन्तोष राईका अनुसार साउनदेखि असोजसम्म ट्राफिक नियम उल्लङ्घन गर्ने ६ हजार ७८५ सवारीसाधनमाथि कारबाही गरिएको छ । उक्त कारबाहीबाट ६९ लाख ७२ हजार रुपैयाँ राजस्व सङ्कलन भएको कार्यालयको तथ्याङ्कमा उल्लेख छ ।
महिनागत विवरणअनुसार साउनमा दुई हजार ४९०, भदौमा दुई हजार २३२ र असोजमा दुई हजार ६३ सवारीसाधनमाथि कारबाही गरिएको छ । कारबाहीको संख्या साउनमा बढी भए पनि सवारी दुर्घटना भने असोजमा बढी भएको देखिन्छ ।
यसैबीच, झापामा एसियन हाइवे निर्माणका क्रममा सडकमा देखिएका अवरोध र खाल्टाखुल्टीले ट्राफिक व्यवस्थापनमा समस्या सिर्जना गरेको स्थानीयले बताएका छन् ।
बिर्तामोड नगरपालिका–३ का स्थानीय राजु श्रेष्ठले पछिल्ला दिनमा एसियन हाइवे निर्माणका कारण सडक आवागमन र ट्राफिक व्यवस्थापनमा समस्या देखिएको बताए । सडकमा रहेका खाल्टाखुल्टी र निर्माणका क्रममा उत्पन्न अवरोधले दुर्घटनाको जोखिम बढाएको उनको भनाइ छ ।
सडक निर्माणका क्रममा सवारी आवागमन सहज बनाउने, निर्माणस्थलमा आवश्यक सङ्केत राख्ने, जोखिमयुक्त स्थानमा ट्राफिक प्रहरी परिचालन गर्ने र सडकका खाल्टाखुल्टी व्यवस्थापन गर्नुपर्ने स्थानीयको माग छ ।
असोज महिनामा दुर्घटना र घाइतेको संख्या बढेको तथ्याङ्कले सडक सुरक्षा व्यवस्थापनलाई थप प्रभावकारी बनाउनुपर्ने देखाएको छ ।
दुर्घटना बढी हुने स्थानको पहिचान, तीव्र गति नियन्त्रण, सवारीसाधनको नियमित जाँच र चालकलाई ट्राफिक नियम पालनामा सचेत गराउने कार्यलाई प्राथमिकता दिन आवश्यक देखिन्छ ।
