विराटनगर,९ कार्तीक । दुग्ध विकास संस्थान (डीडीसी) को विराटनगर दुग्ध वितरण आयोजनाबाट निस्कने कालो धुलो र मसिना कणका कारण आसपासका बस्तीको जनजीवन कष्टकर बनेको छ। दूध प्रशोधनका क्रममा भुस बाल्दा निस्कने धुलोको उचित व्यवस्थापन नहुँदा विराटनगर महानगरपालिका–३ र ४ का बासिन्दा प्रभावित भएका हुन्।आयोजनाबाट निस्कने कालो धुलो आँगन, छत, झ्याल हुँदै कोठाभित्रसम्म पुग्ने गरेको छ। बिहान उठ्दा घरका भित्ता र भुइँ कालो धुलोले ढाकिने गरेको स्थानीय बताउँछन्। दैनिक सरसफाइमा समस्या हुनुका साथै बालबालिका, ज्येष्ठ नागरिक र श्वासप्रश्वासका बिरामीको स्वास्थ्य जोखिममा परेको भन्दै स्थानीय आक्रोशित छन्।
स्थानीय युवा मुकेश बुढाथोकीका अनुसार पटकपटक खबरदारी गर्दा पनि समस्या समाधानमा ठोस पहल भएको छैन। मानव स्वास्थ्यमा खेलवाड गरिएको छ, भुइँमा हिँड्दा खुट्टाभरि कालो धुलो लाग्छ र स्वास्थ्य समस्या देखिन थालेको छ, उहाँले भन्नु भयो।यता आयोजना प्रमुख नवीनकिशोर शर्माले दूध उमाल्न भुस बाल्दा धुलो र मसिना कण निस्कने गरेको स्वीकारनु भएको छ संस्थान पुरानो र बस्ती पछि विस्तार भएको तर्क गर्दै उहाँले धुलो नियन्त्रणका लागि छान्ने उपकरण प्रयोग गरिएको र थप न्यूनीकरणका लागि अध्ययन भइरहेको बताउनु भयो। यद्यपि, प्रदूषण नियन्त्रणको स्पष्ट समयसीमा भने आयोजनाले दिएको छैन। स्थानीयले भने आश्वासन मात्र नदिई आधुनिक प्रविधि जडान गरेर तत्काल प्रदूषण रोक्न माग गरेका छन्। उनीहरूले विराटनगर महानगरपालिका, वातावरण विभाग र जिल्ला प्रशासन कार्यालयलाई स्थलगत अनुगमन गरी प्रदूषण नियन्त्रणका लागि ठोस कदम चाल्न आग्रह गरेका छन्।
