विराटनगर,१० कार्तीक । आवश्यक कागजातबिना सञ्चालन भइरहेको करिब २० लाख रुपैयाँ बराबरको एक भारतीय स्कार्पियो गाडी मोरङ प्रहरीले नियन्त्रणमा लिएको छ। प्रहरीलाई देखेपछि चालक भने गाडी छाडेर फरार भएका छन्।विराटनगर महानगरपालिका–४ नहरचोकस्थित सडक किनारबाट सोमबार बिहान उक्त गाडी बरामद गरिएको हो। दक्षिणबाट उत्तरतर्फ जाँदै गरेको भारतीय नम्बर प्लेटको महिन्द्रा कम्पनीको सेतो रङको स्कार्पियो ९बीआर ११ पीए ४२५४० लाई रोक्न खोज्दा चालक भागेका थिए। जिल्ला प्रहरी कार्यालय मोरङबाट प्रहरी सहायक निरीक्षक डम्बर गिरीको कमान्डमा खटिएको गस्ती टोलीले बेवारिसे अवस्थामा गाडी नियन्त्रणमा लिएको हो।
गाडीको इन्जिन नम्बर एसजेजी४सी१२२३४ र चेसिस नम्बर एमए१टीए२एसजेएक्सजी२सी२७९०१ रहेको प्रहरीले जनाएको छ।कुनै पनि वैध कागजात फेला नपरेकाले भन्सार छली गरी गाडी नेपाल भित्र्याइएको आशंका गरिएको मोरङ प्रहरी प्रमुख एसपी कवित कटवालले बताउनुभयो। बरामद स्कार्पियोलाई थप अनुसन्धान तथा कानुनी कारबाहीका लागि विराटनगर भन्सार कार्यालयमा बुझाइएको छ भने फरार चालकको खोजी तीव्र पारिएको प्रहरीले जनाएको छ।
