उदयपुर,१९ कार्तीक । कोशी प्रदेशका मुख्यमन्त्री हिक्मतकुमार कार्कीले उदयपुर सिमेन्ट उद्योग सञ्चालनको जिम्मेवारी प्रदेश सरकारलाई दिए विगतको तुलनामा दोब्बर उत्पादन क्षमतामा सञ्चालन गरेर देखाउने दाबी गर्नु भएको छ।बुधबार त्रियुगा नगरपालिका–६, जलजलेस्थित यातायात व्यवस्था सेवा कार्यालयको उद्घाटनका लागि उदयपुर आँउनु भएको मुख्यमन्त्री कार्कीले सदरमुकाम गाईघाटमा सञ्चारकर्मीहरूसँग कुरा गर्दै उद्योगको व्यवस्थापन र सञ्चालनको जिम्मेवारी प्रदेश सरकारलाई दिन संघीय सरकारसँग माग गर्दै आएको बताँउनु भयो।
विगतका सरकारका पालादेखि नै प्रदेश सरकारले उदयपुर सिमेन्ट उद्योग सञ्चालनको जिम्मेवारी लिन संघीय सरकारसँग आग्रह गर्दै आएको उल्लेख गर्दै उहाँले उद्योगका विद्यमान समस्या प्रदेश सरकारले पहिचान गरिसकेको बताँउनु भयो।मुख्यमन्त्री कार्कीले उद्योगका प्राविधिक, व्यवस्थापकीय तथा आर्थिक लगायत सबैखाले समस्या समाधान गरेर उद्योगलाई थप व्यवस्थित रूपमा सञ्चालन गर्न सकिने दाबी गर्नु भयो। प्रदेश सरकारलाई जिम्मेवारी दिए उद्योगलाई अहिलेको अवस्थाबाट माथि उठाउँदै विगतको तुलनामा दोब्बर उत्पादन क्षमतामा सञ्चालन गर्न सकिने उहाँको भनाइ थियो।
उहाँले उदयपुर सिमेन्ट उद्योगलाई उत्पादन र रोजगारीको केन्द्रका रूपमा मात्रै नभई वातावरणमैत्री औद्योगिक क्षेत्रका रूपमा समेत विकास गर्ने योजना सुनाँउनु भयो। उद्योग परिसरभित्र हरित पार्क निर्माण गरी हरियाली र स्वच्छ वातावरण कायम गर्दै उद्योग सञ्चालन गर्ने उहाँले बताँउनु भयो।लामो समयदेखि विभिन्न आर्थिक, प्राविधिक तथा व्यवस्थापकीय समस्या झेल्दै आएको उदयपुर सिमेन्ट उद्योगको पुनरुत्थानका विषयमा मुख्यमन्त्री कार्कीको यो अभिव्यक्तिलाई महत्त्वपूर्ण रूपमा हेरिएको छ।उद्योगको सञ्चालन तथा व्यवस्थापन प्रदेश सरकारलाई हस्तान्तरण गर्ने विषयमा संघीय सरकारले निर्णय गर्नुपर्ने हुन्छ। मुख्यमन्त्री कार्कीको प्रतिबद्धता कार्यान्वयनमा आउन संघीय सरकारको निर्णय महत्त्वपूर्ण हुने देखिन्छ।
