दमक/
यतीबेला देशब्यापीरुपमा नेपाली कांग्रेसको १४ औ महाधिवेशनको रौनक छ । घोषित कार्यक्रम र कार्यतालिका अनुसार पहिलो चरणमा वडास्तरको अधिवेशन चलीरहेको छ । यसै क्रममा झापाको दमकमा पनि सुरु भएको छ ।
दमकमा रहेका १० वटा वडाहरु मध्ये ८ वटा वडामा शनिबार भएको अधिवेशनले सर्वसम्मत नेतृत्व चयन गरेको छ । यहाँका वडा नं १ र ९ बाहेकका सबै वडाका सभापतिमा सर्वसम्मत चयन भएको नेपाली काग्रेस दमक नगर सभापति रोषन विष्टले जानकारी दिनुभयो ।
उहाँका अनुसार दमक वडा नं २ मा भागवत प्रसाद दुलाल, वडा नं ३ मा गोपाल गिरी, वडा नं ४ मा राजेन्द्र प्रसाद सिटौला, वडा नं ५ मा चैतन्य बराल वडा नं ६ मा मणी बहादुर बुढाथोकी, वडा नं ७ मा अतीत वान्तावा राई, वडा नं ८ मा चन्द्र खत्री र वडा नं १० मा धनश्याम खनाल निर्विरोध चयन हुनु भएको छ । यस्तै वडा नं १ र ९ मा भने आईतबार निर्वाचन हुने भएको छ । अथक प्रयास गर्दापनि वडाको सभापतिमा प्रत्यासीहरु बिच सहमतीमा नजुटेपछि चुनाव गर्नु परेको जनाइएको छ ।
वडा नं १ मा गजेन्द्र देवान र जीवन सिवाकोटी बिच प्रतिस्पर्धा हुने भएको छ भने वडा नं ९ मा तीन जना प्रत्यासीहरु हुनुहुन्छ । सभापति विष्टका अनुसार यस वडामा बर्तमान वडा सभापति राजकुमार गौतम , ठाकुरहरी पोखरेल र यूवराज कोईरालाले सभापति बन्ने इच्छा देखाउनु भएको छ । उहाँहरुबिच आईतबार निर्वाचन हुने भएको छ ।
दमकमा ३ हजार ३ सय ५४ जना क्रियसिल सदस्य छन् । तालिका अनुसार भदौ २७ गते नगरको अधिवेशन हुनेछ । वडाबाट निर्वाचीत पदाधिकारीले २७ गते दमक नगर समिती चयन गर्ने छन् ।
अहिलेसम्म नगर सभापतिमा बर्तमान सभापति रोषन विष्ट, सचिव प्रकाश प्रसाइ र बरिष्ठ नगर सदस्य पर्शुराम रिजालले नगर सभापति बन्ने इच्छा देखाउनु भएको छ । अन्तिम सम्ममा सहमतिकै लागि निरन्तर प्रयास जारी राखीने जनाइएको छ ।
