झापा/
पूर्व पश्चिम राजमार्ग अन्तरगत झापाको शिवसताक्षी नगरपालिका १० स्थित माइधारमा आज बिहान साढे ८ बजे प्रदेश ०३-००१-क-००९५ नम्बरको टिपरले को २ च २६३२ नम्बरको पिक अप भ्यानलाई ठक्कर दिएको थियो । टिपरको ठक्करबाट भ्यान चालक दमक नगरपालिका- वडा नं ९ निवासी ३९ वर्षीय नेत्र खड्काको मृत्यु भएको थियो । पिकअप भ्यान सडकमा रोक्न खोजी रहेको अवस्थामा टिपरले पछाडिबाट ठक्कर दिँदा सो भ्यान कनकाई सिँचाइ आयोजनाको नहरमा पल्टिएर पानीमा डुबेको थियो । पानीमा डुबेको गाडी निकाल्दा चालकको गाडीभित्रै मृत्यु भइसकेको थियो ।
यही स्थानमा थप २ जना नहरमा बगेको भन्दै खोजी कार्य गरि रहिएको प्रहरीले जनाएको छ । बगाइएकाहरु स्थानीयबासी हुन सक्ने तर अहिले सम्म पहिचान भने हुन नसकेको बताइएको छ । अहिले सो नहरमा बग्ने पानी मुहानबाटै बन्द गरिएको छ । दोमुखा स्थित मुख्य मुहानको पानी थुनेर बगेर हराएकाहरुको खोजी कार्य तिब्र बनाइएको प्रहरीले जनाएको छ ।
अवरुद्ध खुल्यो
सवारी दुर्घटना पछि अवरुद्ध रहेको झापाको शिवसताक्षी स्थित पूर्व पश्चिम राजमार्ग अहिले भने सुचारु भएको छ । टिपरको ठक्करबाट एक जनाको मृत्यु भएपछि आक्रोशित स्थानीयवासीले अवरोध राजमार्ग ३ घण्टा पछि खुलेको हो ।
पीडित पक्षले विभिन्न माग राखेको सो विषयमा छलफल गरेर टुङ्गाउने विषयमा झापा प्रहरी सहमत भएपछि राजमार्ग सुचारु भएको छ । पीडित पक्षले मृतक परिवारलाई उचित क्षतिपूर्ति दिनुपर्ने, मृतकका श्रीमतीलाई रोजगारी र छोराछोरीलाई निःशुल्क पठनपाठनको व्यवस्था मिलाउनु पर्ने, राजमार्गमा ट्राफिक चेकजाँच गर्दा जेब्रा क्रसिङ भन्दा दायाँबायाँ ५ सय मिटर पर गर्नुपर्ने र राजमार्गमा भएका खाल्डाखुल्डीलाई तत्काल व्यवस्थापन गर्नु विषयमा माग राखेको थिए ।
सो मागको विषयमा प्रहरी, जनप्रतिनिधि र पीडित पक्षको बैठकबाट छलफल गरी टुङ्गाउने लगाउने मौखिक सहमति पश्चात् राजमार्ग खुलेको जिल्ला प्रहरी कार्यालय झापाले जनाएको छ । बिहान साढे ८ बजेदेखि सडकमा टायर बालेर प्रदर्शनमा उत्रिएका स्थानीयवासीले साढे ११ बजेसम्म राजमार्ग अवरोध गरेका थिए ।
टिपर र टिपर चालक जिल्ला मकवानपुर थाहा नगरपालिका- वडा नं ८ निवासी २४ वर्षीय सहदेव कार्कीलाई इलाका प्रहरी कार्यालय सुरुङ्गाको टोलीले नियन्त्रणमा लिएको छ ।
