झापा। जनता समाजवादी पार्टी नेपालका सङ्घीय परिषद् अध्यक्ष तथा पूर्व प्रधानमन्त्री डा. बाबुराम भट्टराईले देशको समृद्धि र विकासका लागि सङ्घीयताको ढाँचा परिवर्तन गर्न आवश्यक रहेको बताएका छन् ।
पाँचथरको कुम्मायक गाउँपालिकामा पार्टीको आमसभालाई सम्बोधन गर्ने क्रममा उनले सबै जातजाति, भाषाभाषीको प्रतिनिधित्व हुने किसिमको सङ्घीयता कार्यान्वयनमा आउन नसकेको बताए । उनले सङ्घीयताको ढाँचा परिवर्तन गर्दै सबैको अधिकार सुरक्षित हुने खालको बनाइनु पर्नेमा जोड दिए । उनले लिम्बुवान, ताम्सालिङ, थारू र मधेशको मुद्दालाई सही रूपमा सम्बोधन गर्न नसकेको बताए ।
देशका केही ठूला पार्टी हौं भन्ने शक्तिले महाधिवेशनमा समावेशी र समानुपातिक ढङ्गले प्रतिनिधि चयन गर्न नसकेको सङ्केत गर्दै उनले जसपाले मात्रै सामावेशीकरणको सिद्धान्त लागू गर्ने दाबी गरे ।
त्यस्तै सभामा पार्टीका केन्द्रीय सदस्य तथा प्रदेश १ का सामाजिक विकास मन्त्री जयराम यादव, पूर्वमन्त्री कार्यकारिणी सदस्य रकम चेम्जोङ, पार्टीका सल्लाहकार डा. महेन्द्रसुन्दर लावतीलगायत दर्जन बढी नेता कार्यकर्ताहरूले पहिचानको मुद्दा आजको आवश्यकता रहेको बताएका थिए ।
कार्यक्रममा कुम्मायक-१ का स्वतन्त्रबाट निर्वाचित वडाध्यक्ष देवेन्द्रकुमार लावतीसहित सयौंको सङ्ख्यामा पार्टी प्रवेश गरेका थिए । उनीहरूले उत्पीडित वर्गको रक्षाको लागि पार्टी प्रवेश गरेको बताए ।
