इलाम/
इलाममा गाईको दूध प्रशोधन गरि चीज उत्पादन गर्ने उद्योग स्थापना भएसँगै रोजगारीका अवसर पनि बढेका छन् । नेपाली बजारमै चीजको अधिक मागले उद्योग स्थापना बढेसँगै इलाममा एक चीज उद्योगमा तीन जनादेखि १० जनासम्म युवाले रोजगारीका पाएका हुन् ।
इलामको सन्दकपूर गाउँपालिका ३ को सेर्पा डेरी उद्योगमा अहिले ५ जनाले रोजगारी पाएका छन् । स्वरोजगार भइ परिवार चलाउने उदेश्यले चीज उद्योग स्थापना गरेका रिञ्जि सेर्पाले अहिले स्थानीय ५ जनालाई रोजगारी दिएका हुन् । दुग्ध विकास संस्थानको जागिर छोडी खोलेको चीज उद्योगमा उत्पादित दुग्ध पदार्थको माग बढेपछिको उद्योग विस्तारले रोजगारीका अवसर थपिएका छन् । ७० लिटर दूधबाट चीज उत्पादन शुरु गरेको सेर्पा डेरीमा अहिले पन्ध्र सय लिटर गाईको दूध प्रशोधन हुन्छ ।
रसुवाबाट रोजगारीका लागि इलाम आएका तुलु तामाङले स्थापना गरेको चीज उद्योगमा अहिले ८ जनाले काम गर्छन् । २०६० सालमा दैनिक २० लिटर दूध संकलनबाट चीज बनाएका तामाङको उद्योगमा अहिले सोह्र सय लिटर दूध प्रशोधन हुन्छ ।
लक्की डेरीमा उत्पादित चीजको माग बढेसँगै रोजगारीका अवसर पनि थपिएका छन् । पूर्वी नेपालमा व्यवसायीक गाई पालनमा प्रसिद्ध इलाममा चीज बनाउने उद्योग स्थापना भएपछि रोजगारीका अवसर थपिएका हुन् । २ दशक अघि सरकारी स्वामित्वमा मात्रै चीज उद्योग रहेको इलाममा अहिले निजी लगानीका उद्योग स्थापना हुने क्रम बढेको सेर्पा डेरी उद्योगका संचालक रिञ्जि सेर्पाले बताउनु भयो ।
चीजका परिकारमा रमाउने नेपालीको संख्या बढेसँगै आन्तरीक बजारमा पनी चीजको खपत बढ्दो छ । चीजको प्रयोग र माग बढेपछि इलाममा नीजि क्षेत्रका उद्योगको संख्या १० पुगेको छ । चीज उद्योगमा तीन जनादेखि १० जनासम्म युवाले रोजगारीका पाएका छन् ।
चीज उद्योगको क्षमता विस्तारले रोजगारीका अवसर थपिँदै गएको हो । इलाममा सरकारी र नीजि गरि १६ वटा चीज उद्योग छन् ।
