दमक, २२ साउन / राष्ट्रिय गौरवको आयोजनाको रुपमा निर्माण भएको दमक ३ स्थित दमक बिजनेश टावरको सञ्चालन कहिलेबाट होला भन्ने सवैमा जिज्ञासा छ । केहीले यसको उपयोगिताका बारेमा प्रश्न समेत उठाउने गरेका छन् । राष्ट्रिय गौरवको आयोजना भएका कारण सरकारी तबरबाटै यसको सञ्चालनको कार्यविधि बनाउने तयारी गरिरहेको बेला यता केही स्थानीयले भनें व्यवस्थापन समिति निर्माण गरेका छन् ।
२०८१ साल साउन १९ गते शनिबारका दिन यस बिजनेश टावर आसपासका केही व्यक्तिहरु भेला भएर यसको व्यवस्थापन समिति गठन गर्नेदेखि लिएर अन्य विभिन्न निणर्य गरे । २३ जना उपस्थित भइ १७ जनाको हस्ताक्षर रहेको माइन्यूटमार्फत बिजनेश टावर सञ्चालन गर्न भन्दै केही स्थानीय व्यक्तिहरुले १९ सदस्यीय ‘दमक बिजनेश कम्प्लेक्स व्यवस्थापन तथा रेखदेख समिति’ निर्माण गरे । समितिको अध्यक्ष, नारायण प्रसाद बराल, उपाध्यक्ष डिल्लीराम चापागाई र काशी कार्की, सचिव महेन्द्र अधिकारी, सह-सचिव सागर दुलाल र दुर्गा घिमिरे अनि कोषाध्यक्षमा कृष्णदेवी खतिवडा तथा अन्य १२ जना सदस्य रहेका छन् ।
समिति निर्माण भएपछि यसलाई सामाजिक सञ्जाल मार्फत सार्वजनिक गरियो । त्यसपछि यो समितिका बारेमा विरोध गर्ने र समर्थन गर्ने दुवै समूह निस्किएका छन् ।
नेकपा एमाले दमक नगर कमिटीले त यो कस्तो समिति बनेको हो र यसको बैधानिकता के भन्नेबारेमा प्रश्न गर्दै नगर अध्यक्ष सहितको टोली दमक नगरपालिका कार्यालयनै पुग्यो । नगर कमिटी अध्यक्ष राम पौडेलको नेतृत्वको टोलीले नगर प्रमुख रामकुमार थापा र प्रमुख प्रशासकीय अधिकृत गणेशराज कार्कीलाई ध्यानाकर्षणपत्र बुझायो ।
दमकको बिजनेश टावर अव सञ्चालनको अन्तिम तयारीमा रहेको बेला यसको व्यवस्थापन भन्दै निश्चित व्यक्ति र समूहले मात्रै समिति निर्माण गरेको भन्दै आपत्ति जनाउदै नगर प्रमुख थापाले त्यसलाई कुनै मान्यता नदिइने जनाउनु भयो । ‘टावर सञ्चालनका लागि निरन्तर छलफल र सम्बन्धीत मन्त्रालयसग समन्य भइरहेको बताउँदै मन्त्रालयले बनाएको कार्यविधि अनुसारनै यसको सञ्चालनमा आफुहरुले समन्वयकारी भूमिका निर्वाह गर्नेछौं ।’- उहाँले भन्नुभयो ।
प्रमुख प्रशासकीय अधिकृत कार्कीले अहिलेसम्म कुनै पनि समितिको बारेमा जानकारी नआएको र त्यो आएपनि त्यसलाई यसै मान्यता दिइहाल्ने स्थिती नहुने प्रतिकृया दिनु भयो । यसबारेमा सम्बन्धित मन्त्रालयलाई समेत पत्राचार गरिने भन्दै आफ्नो ध्यानाकर्षण भएको कार्कीले बताउनु भयो ।
यता यसअघि पार्टीगत रुपमा दमकका विभिन्न योजनाको आवश्यकताका बारेमा प्रधानमन्त्री केपी शर्मा ओलीलाई जानकारी गराउन गएको एमाले नगरको टोलीले दमक बिजनेश टावरका बारेमा समेत कुरा राखेको थियो । त्यसबेला प्रधानमन्त्रीले कार्यविधि द्रुतगतिमा बनिरहेकोले त्यसको सम्पन्नतासँगै सञ्चालनमा आइहाल्ने भनेर प्रधानमन्त्रीले जानकारी गराउनु भएको एमाले दमक अध्यक्ष पौडेलले उल्लेख गर्नुभयो ।
यता सो समिति कसरी गठन गरियो र समितिले के गर्छ ? साथै यसको वैधानिकता के हो भन्नेबारेमा यसका सचिव महेन्द्र अधिकारीलाई हामीले केही प्रश्न गरेका छौ । हाल भोजपुरमा रहनु भएका उहाँले टेलिफोनमार्फत आफ्नो धारणा राख्दै सरकारको अब बनाउने नीति नियमभन्दा बाहिर नगई स्थानीयको माग अनुसार टावर सञ्चालनका लागि सहयोग पुर्याउन समिति बनाइएको जवाफ दिनुभयो । समितिलाई वैधानिकता दिँदै जाने पनि उल्लेख गर्नुभयो ।
डेढ अर्व भन्दा धेरै लगानीमा बनेको यो टावर १८ तलाको छ । यी सबै तलामा विभिन्न प्रकारका व्यवसायिक कारोबार गर्न सकिने छ । टावरको बाहिरी भागमा पार्क निर्माण गरिएको छ भने बाल उद्यान पनि रहेको छ । यसको निर्माण कार्य सम्पन्न भइसकेको छ । तर निर्माण कम्पनीले सरकारलाई हस्तान्तरण गर्न भनें बाँकी रहेको छ ।
कोशी प्रदेशकै लागि महत्वपूणर् योजनाका रुपमा हेरिएको बिजनेस टावरको सञ्चालन विवादरहित रुपमा अघि बढाउनु आवश्यक छ । यसले स्थानीय क्षेत्रको व्यवसायिक प्रवद्र्धनमा सघाउने धेरैजसो स्थानीयको अपेक्षा छ ।
