पथरी, २९ असोज / मोरङको पथरी शनिश्चरे नगरपालिका अन्तर्गतको कला साहित्य प्रवद्र्धन समितिले कला र साहित्यको मासिक कार्यक्रम ‘सृजना मझेरी’ सञ्चालन गर्ने भएको छ ।
पथरी शनिश्चरेको सृजना क्षेत्रको गतिविधिको इतिहासलाई व्यूँताउँदै मासिक रूपमा साहित्य र कलाका प्रस्तुतिको कार्यक्रम सञ्चालन गर्ने निर्णय बमोजिम श्रृंखलावद्ध कार्यक्रम ‘सृजना मझेरी’को तयारी भएको समिति अध्यक्ष धनराज राई अमीरले जनाउनु भयो । सो कार्यक्रमको पहिलो श्रृंखला असोज ३१ गते हुने भएको छ । दशैं, तिहार, छैठको शुभकामना आदानप्रदानसहितको सो कार्यक्रममा नगर बाहिरका केही अतिथि श्रष्टाका साथमा नगरका सर्जकहरुको प्रस्तुतिको कार्यक्रम तय भएको सचिव लक्ष्मीप्रसाद फुयालले सुनाउनु भयो ।
सवै मानिसहरुमा सृजना विस्तार गर्दै सृजनशील समाज निर्माणको हेतुले विभिन्न सामाजिक संघ संस्थाका अगुवाहरुलाई पनि कार्यक्रममा उपस्थितिका लागि आमन्त्रित गरिएको छ । उहाँहरुको उपस्थितिले नगरको सृजनात्मक गतिविधिलाई प्रोत्साहित गर्ने समितिले विश्वास लिएको छ ।
‘विद्यार्थीसँग साहित्य’ कार्यक्रमको पनि तयारी
समितिले यो वर्ष कम्तिमा ३ महिनाको कार्यक्रम विद्यालयका विद्यार्थीहरुका लागि तय गरेको छ । विद्यार्थीहरुमा साहित्य लेखनको प्रशिक्षणमूलक कार्यक्रमका रुपमा ‘विद्यार्थीसँग साहित्य’ को तयारी गरिरहेको हो । जसमा साहित्य सिक्न इच्छुक नगरका सबै विद्यालयका विद्यार्थीको संख्याको आधारमा उनीहरुलाई लागि पायक पर्ने विद्यालयमा साताको एक दिन विद्यालयको अतिरिक्त क्रियाकलापको कार्यक्रमसँग जोडेर सो प्रशिक्षण सञ्चालन गरिने यसका संयोजक गणेश बाछाना राईले जनाउनु भयो । जसका लागि पाठ्यक्रम समेत निर्माण गरिएको छ ।
