पथरी, १० असोज ।
श्रममा विश्वास राख्नेहरु भोको बस्नु नपर्ने मात्र होइन, आर्थिकसहितको सामाजिक प्रगति गर्न सकिएको कतिपय उदाहरण हाम्रो समाजमा देख्ने गरेका छौं । त्यसैमध्येमा पर्नुहुन्छ न्यू गोर्खाली पाउरोटी उद्योगका प्रमुख तुलसीराम ढकाल ।
मोरङ जिल्लाको पथरी शनिश्चरे नगरपालिका वडा नम्बर १ का बासिन्दा उहाँले ०५० सालबाट सुरु गर्नुभएको उपभोक्ताको भोक मेट्ने एउटाखाले खाजा ‘पाउरोटी’को व्यवसायले आर्थिक उपार्जनसहित सामाजिक चिनारी समेत स्थापित गर्यो । राजनीतिक र सामाजिक हिसावले समेत सक्रिय बन्दै आउनु भएका उहाँले ‘हाम्रो उत्पादन, हाम्रै प्रयोग’ भन्ने अवधारणालाई अघि बढाएर समृद्धि प्राप्त गर्न सकिने सन्देश दिनु भएको छ । ‘स्थानीयले नै उत्पादन गर्ने र त्यसको उपभोग स्थानीयबाटै गर्नुपर्छ भन्ने सन्देशका लागि समेत मैले यो काम अघि बढाएको हो ।’- उहाँले व्यवसायसँगको सामाजिक औचित्य प्रट्याउनु भयो ।
उहाँकी जीवनसंगीनी राधा र छोराछोरी समेत दृढ भएर यो व्यवसायिक यात्रामा सामेल बन्नु भयो । मोटरसाइकल वर्कसप, ग्यारेजसहितका व्यवसायबाट जोरजाम पारेको रकमबाट पाउरोटी उद्योगकै प्रवद्र्धनमा लगानी गर्नुभयो । २ लाख ५० हजारको लगानीमा दाउराको चुल्होबाट सुरु गर्नुभएको पाउरोटी उत्पादनको कामका लागि हालसम्म २ करोड रुपैयाँभन्दा बढीको लगानी छ । जहाँ हाल आधुनिक ओभनसहितका प्राविधिक उपकरणमार्फत व्यवसाय प्रवद्र्धन गरिएको छ । भाडाको घरमा व्यवसाय सञ्चालन गर्दै आएको अवस्थामा पाउरोटीको आम्दानीमा थपथाप गरी उहाँले ०६२ सालमा पथरी बजारको मन्दिर लाइनमा तीनतले घर निर्माण गरी त्यहीँ उद्योग सञ्चालन गरिरहनु भएको छ ।
मोरङ त भइनै हाल्यो, झापा अनि पाँचथरको रविसहितका स्थानसम्म पनि यो पाउरोटीका परिकारको स्वाद पुगेको छ ।
पथरी बजारकी व्यवसायी इन्दु फुयाल निरौलाले सो पाउरोटी उद्योगका उत्पादन गुणस्तरीय रहेको प्रतिक्रिया दिनु भएको छ ।
त्यहाँ उत्पादित पाउरोटी, विस्कुट तथा केकका विभिन्न परिकार ७ वटा गाडी र दुई वटा मोटरसाइकलमार्फत बजारका पसलहरुमा पुर्याइन्छ । पाउरोटी निर्माण र बजारतर्फ गरी ४० जना जनशक्ति खटिएको छ ।
यसको बजार व्यवस्थापन हेर्ने पथरी शनिश्चरे ३ का देवीप्रसाद दंगाल यसैबाट आफ्नो आर्थिक अवस्था सुधार मात्र होइन सामाजिक काममा समेत स्थापित गराएको खुसी व्यक्त गर्नुहुन्छ । उहाँले भन्नुभयो ‘मेरो ५ कठ्ठा मात्रै जग्गा थियो, यसैमा गरेको कामबाट कमाएर १ विगाह जग्गा बनाएँ, अनि वीरेन्द्रनगर वचत सहितको संस्थाको नेतृत्व गरेर सामाजिक पहिचान बनाउन सकें । यो सवै यही पाउरोटीको देन हो ।’
आफु पहिलेदेखि नै मजदुरका रुपमा आफ्नो उत्पादन सुरु गर्दै मजदुरको सम्मान र प्रोत्साहनका काममा समेत ध्यान पुर्याउँदै आउनु भएका ढकाल हाल एकीकृत ट्रेड युनियन महासंघको राष्ट्रिय कमिटीमा आवद्ध हुनुहुन्छ । नगर क्षेत्रमा कति पाउरोटी उद्योग बन्द भइसकेका छन् । इमान्दारितापूर्वक उपभोक्ताको हितमा ध्यान दिँदै अरुलाई पनि उत्पादन क्षेत्रमा लाग्ने प्रेरणा भर्दै आएको न्यू गोर्खाली भनें निरन्तर आफ्नो गतिमा अघि बढिरहेको छ । मिसावटमुक्त गुणस्तरीय उत्पादनमा जोड दिँदै आएको यस उद्योगले घरेलु उद्योग महासंघ मोरङबाट ०७९ मा उत्कृष्ठ उद्यमीको सम्मान प्राप्त गरेको छ ।
