दमक, १४ असोज / चक्लेटी जोडी धिरज मगर र उपासनासिंह ठकुरी अभिनित हाल प्रदर्शनमा रहेको चलचित्र ‘खुस्मा’ को निर्माण पक्षसहित कलाकारहरुको टोलीले पूर्वका हलहरुमा दर्शकहरुसँग भेटघाट गरेको छ ।
यसक्रममा सोमबार झापाको दमकस्थित डी म्याम्स सिनेमाजमा दर्शकहरुसँग भेटघाट गर्दै नायक धिरज, नायिका उपासना सहितको टिमले खुसी साटेको छ । असोज ३ गतेबाट देशभर प्रदर्शनमा आएको चलचित्र ‘खुस्मा’ ले आफूहरुको मन छोएको दर्शकहरुले प्रतिक्रिया दिँदै हुटिङ गरेका छन् ।
झापाको बिर्तामोडबाट दमक आइपुगेको कलाकार टोलीलाई डीम्याक्स सिनेमाजको टोलीले स्वागत गर्दै दर्शकहरुसँग संक्षिप्त भेटघाट गराएको हो । टोलीले सोमबार नै इटहरी र धरानका हलहरुमा समेत दर्शकसँग भेटघाटको क्रम अघि बढाएको छ ।
चलचित्रमा धिरजले पश्चिम रुकुमको एक लजालु मगर ठिटोको भूमिका निर्वाह गर्नुभएको छ भने उपासनाले पनि मगर समुदायको युवतिको प्रतिनिधित्व गरेको देखिन्छ । चलचित्रमा दुबैको भेषभुषा पनि त्यस्तै किसिमको छ । तर चलचित्रले मगर समुदायको कथा भन्दा पनि सरकार र माओवादी बीच भएको द्वन्द्वले समाजमा पारेको असरलाई पर्दामा उतारको छ ।
‘इन्टुमिन्टु लण्डनमा’बाट चलचित्रमा डेब्यू धिरज र ‘क्याप्टेन’बाट डेब्यू उपासनाबीच जोडीका रुपमा यो पहिलो चलचित्र हो । भेटघाटका क्रममा नायक धिरजले सवैतिर चलचित्र दर्शकले मनपराईदिएको प्रतिक्रिया दिनु भयो ।
चलचित्रका बारेमा नायिका उपासनाले माओवादी र सरकारको द्वन्दको समयको अवस्थालाई चलचित्रमा उतारिएको जनाउँदै चलचित्रले त्यो बेलाको असर प्रस्तुत गर्न सफल भएको जनाउनु भयो ।
डेव्यु निर्देशक अशोक थापामगरको निर्देशनको सो चलचित्रको ‘रुकुम मैकोट’ गीतले चलचित्र रिलिज हुनु अघि नै युट्युवमा १ करोड बढी भ्यूज बनाएको थियो ।
