दमक, कार्तिक १३
२०८१ कार्तिक १२ गते वन तथा वातावरण मन्त्रालय अन्तर्गतको वातावरण बिभागले एउटा सुचना जारी गरेको छ । जसमा भनिएको छ ‘प्लाष्टिकजन्य फूलगुच्चामा प्रतिबन्ध लगाउने भनेर ।’ विभागले यसखाले पत्र लेखेर भन्सार विभागलाई पठाएको छ सबै सीमामा रहेका भन्सार कार्यालयबाट यसको आयात रोक्न भनेर । तर विभागले पत्राचार गर्नु अघि नै बजारमा भने छ्यापछ्याप्ती प्लाष्टिकजन्य फूलगुच्छाहरु आइरहेका छन् ।
अहिले तराईका बजारहरुमा प्रकृतिक फूलगुच्छा भन्दा यस्ता प्लाष्टिकजन्य फूलका गुच्छाहरु जताततै देख्न सकिन्छ ।
झापाको दमक बजार र मुख्य चोकमा अहिले प्रतिबन्धित यस्ता फूल गुच्छाहरु खुलाम खुला बिक्री भइरहेको छ । बजारको अनुगमन गर्ने निकाय स्थानीय तह यसबारेमा मुकदर्शक बनेको छ । अनुगन गर्न भनेर दमक नगरपालिकाले उप प्रमुख रेगिना भट्टराई प्रसाईको संयोजकत्वमा समिति बनाएको छ । तर अहिले उहाँ बिदामा हुनुहुन्छ । तर यो वातावरणसँग जोडिएको हुनाले वातावरण समितिले पनि यसमा सजग हुनुपर्ने हो । तर समितिका अध्यक्ष टेक बहादुर थापा पनि अहिले बिदामा हुनुहुन्छ ।
हामीले नगरपालिकाका वातावरण अधिकृत भुवन बराललाई प्रश्न गरेका छौं ‘दमक यसरी छ्यापछ्याप्ती बेचिरहिएको प्लाष्टिकजन्य सामग्रीले वातावरणमा कुनै असर पार्दैन ? किन नियन्त्रणमा लिन नसकेको ?’ उहाँको जवाफ छ ‘हामीले बजारमा अनुगमन् गर्दैछौं । त्यस्तो भेटिएमा कारबाही गर्छौं ।’
२०७९ साल असार १२ गते नेपाल सरकारको मन्त्री परिषदको बैठकलेनै यस खाले फूल गुच्छा विक्री वितरण र आयातमै प्रतिबन्ध लगाउने निणर्य गरेको थियो । यसले मानव स्वास्थ्यसँगै वातावरणमा समेत असर पार्ने भन्दै प्रतिवन्ध लगाइएका यस्ता सामग्री मरिहत्ते गरेर ब्यापारीले चाँहि किन बेचेको भनेर हामीले दमक उद्योग वाणिज्य सघंका अध्यक्ष गोपाल गुरागाईलाई प्रश्न गरेका छौं । ‘प्लाष्टिकका फूल बेच्न नहुनेखाले सूचना हामीले हाम्रो फेसबुक पेजमा शेयर गरेका छौं । अनि भन्सार क्षेत्रसहितबाट प्लाष्टिकका फूल किन नरोकेको भनेर सरकारलाई हाम्रो प्रश्न पनि छ ।- उहाँले भन्नुभयो ।
तिहार र छठमा प्लास्टिकजन्य फूल, माला तथा अन्य सामग्रीहरु विक्री वितरण गरेको पाइएमा १ लाख रुपैयाँसम्म जरिवाना हुने चेतावनी छ । त्यस्तो विपरीत कुनै कार्य गरेको पाइएमा वातावरण निरीक्षकबाट १५ हजारदेखि २० हजारसम्म जरिवाना हुने र विभागका महानिर्देशकबाट १ लाखसम्म जरिवाना हुने जारी गरेको सूचनामा उल्लेख छ । तर बजारमा तिहार सुरु नहुँदै प्लास्टिकका फूल तथा मालाहरु बेच्न राखिएको छ ।
