दमक, मंसिर १
बच्चाहरुले चोट लुकाए जस्तैगरी आफ्नो चोट देखाउने भोगाईको परिस्थिती लगायतका जीवनका तमाम भोगाई अनि सराबसँग जोडेर प्रेमिल गजल उन्न माहिर पूर्वका शक्तिशाली गजलकार कृष्ण घिमिरे काश्यपको दोस्रो गजल पुस्तक कृति ‘सराब’ को लोकार्पण गरिएको छ ।
समसामयिक विषयमा समेटिएको भावप्रधान ९५ वटा गजल समावेश ‘सराब’को प्रकाशक संस्था दमक श्रष्टा पब्लिकेशनले शनिबार दमकस्थित कदम थिएटरमा लोकार्पण गराएको छ । कृतिका रुपमा आएको गजल सराबले सबैलाई आनन्दित बनायो ।
कार्यक्रमकी प्रमुख अतिथि नेपाल प्रज्ञा प्रतिष्ठानकी प्राज्ञ सदस्य सुमित्रा बाङ्देल चेलीको अगुवाईमा अर्का प्राज्ञ मुनाराज शेर्मा, साहित्यकार प्रकाश बुढाथोकी, शिव रेग्मी प्रणतसहितले कृति विमोचन भयो । कार्यक्रममा बोल्दै चेलीले नेपालमा गजललाई पुरानो ढर्राबाट माथि उकासेर सवै विषयलाई समेट्न थालिएकाले यो स्थापित बनेको प्रसंग अघि सार्नुभयो । उहाँले काश्यपको गजलको प्रभावकारिताको समेत चर्चा गर्नुभयो ।
कार्यक्रममा पुराना साहित्यकार केशव आचार्यले काश्यपसँगको सामिप्यता र उहाँका गजल प्रभावकारी भएको चर्चा गर्दै रुबाईमार्फत कृतित्व र व्यक्तित्वको सटिक समीक्षा गर्नुभयो ।
कृतिमाथि समीक्षात्मक टिप्पणी गर्दै गजलकार घनश्याम पथिकले लेखन र व्यवहार दुवैमा प्रभावकारी काश्यपको गजल आफैंमा संगीत भरिएकाखाले गहन भावका रहेको औंल्याउनु भयो ।
कार्यक्रममा साहित्यकार छवि बैरागी घिमिरे, लीला अनमोल, मधु केरुङ, सुनिता तामाङ, नाट्यकर्मी सिजन दाहालसहितले काश्यपका गजल वाचनसहित शुभकामना व्यक्त गर्नुभयो । कार्यक्रम पब्लिकेशनका अध्यक्ष साहित्यकार सुन्दर कुरुपको अध्यक्षतामा सम्पन्न भयो ।
मुख्य रुपमा गजल लेख्न रुचाउने झापाको शिवसताक्षीस्थित धरमपुर निवासी काश्यपको ‘नयनभित्र तिम्रो तस्वीर’ नामक पहिलो गजल संग्रह २०६४ मा प्रकाशित भएको थियो ।
