पथरी, मंसिर ९
पथरी जेसीजले मोरङको पथरी शनिश्चरे वडा नम्बर ६ को मुसहरघट्टालाई ‘जेसीज गाउँ’ घोषणा गर्दै ऋषिदेव बस्तीका बालबालिकाहरूलाई शैक्षिक सामग्री प्रदान गरेको छ ।
जेसीज गाउँ राष्ट्रिय संयोजक सुमित्रा घिमिरे भट्टराईको प्रमुख आतिथ्यतामा मुसहरघट्टामा पथरी जेसीजले जेसीज सप्ताह सुरु गर्दै त्यस्तो कार्यक्रम अघि बढाएको हो । मुसरघट्टा पुलमा ‘जेसीज गाउँ’ लेखिएको बोर्ड समेत अनावरण गरिएको छ ।
सप्ताहको पहिलो दिन अति विपन्न ऋषिदेव बस्तीका १५ घर परिवारका ३५ जना बालबालिकाहरुलाई कापी, डटपेन ,पेन्सिल लगायत शैक्षिक सामग्रीहरू प्रदान गरेको छ ।
सो ऋषिदेव बस्तीलाई ‘जेसीज गाउँ’ घोषणा गरी वडा नम्बर ६ को वडा कार्यालयसंग समन्वयमा त्यहाँको शिक्षा तथा सामाजिक विकासका लागि आगामी सन् २०३० सम्म विभिन्न कार्यक्रमहरू संचालन गर्ने घोषणा गरिएको पथरी जेसीज अध्यक्ष राजकुमार विश्वकर्माले बताउनुभयो ।
सो सम्बन्धमा वडा नम्बर ६ का वडाध्यक्ष कृष्णकुमार बस्नेत र पथरी जेसीजका अध्यक्ष राजकुमार विश्वकर्माले एक सम्झौता पत्रमा हस्ताक्षर गर्नुभएको छ ।
पथरी जेसीजका कार्यकारणी उपाध्यक्ष नगेन्द्र बहादुर घिमिरेको संयोजकत्वमा जेसीज सुरू भएको महासचिव निर्मला भट्टराई गिरीले जानकारी दिनुभयो । सप्ताह आगामी मङ्सिर १६ गतेसम्म सञ्चालन हुने छ ।
