दमक, मंसिर ११
नेपालमा पछिल्लो समय कृषिजन्य बस्तुको निर्यात बढ्दै गएको छ । पूर्वी नाका काँकडभिट्टाबाट पछिल्लो समय आयातको तुलनामा कृषि वस्तुको निर्यात सात गुणा बढी भएको देखिएको छ ।
यस क्रममा पूर्वीनाका काँकडभिट्टाबाट चालु आर्थिक वर्ष २०८१/८२ को प्रथम त्रैमासिक अवधिमा सात अर्ब ८२ करोड ५५ लाख चार हजारको कृषि बाली भारत निर्यात भएको प्लान्ट क्वारेन्टाइन कार्यालय काँकडभिट्टाले जनाएको छ । सो अवधिमा काँकडभिट्टाबाट ७९ करोड ६३ लाख १० हजारको कृषि बाली आयात भएको छ ।
सो अवधिमा चार अर्ब ४८ लाखको चिया, एक अर्ब ५५ करोडको अलैँची, एक अर्ब पाँच करोडको प्लाई तथा भेनियर, ३३ करोड ९६ लाखको अम्रिसो, २० करोड ५५ लाखको अदुवा, छ करोड ४८ लाखको बन्दाकोभी, एक करोड ५५ लाखको मसुरो दाल, ५१ लाख १९ हजारको जडीबुटी र ११ करोड ५३ लाखको अन्य कृषि बाली भारत निर्यात भएको प्लान्ट क्वारेन्टाइन कार्यालय काँकडभिट्टाका सूचना अधिकारी चन्द्रेश्वर ठाकुरले जनाउनु भयो । सोही अवधिमा आयात भएका वस्तुमा दलहन, ताजा फलफूल, आलु, लसुन, कोदोलगायत कृषि बाली रहेका छन् ।
सूचना अधिकारी ठाकुरले कृषि बालीहरूको निर्यात बढ्दै जानुले भारतसँगको व्यापार घाटा कम गर्न महत्वपूणर् सहयोग पुर्याउने बताउनु भयो ।
पूर्वी पहाडी जिल्ला इलाम, पाँचथर र ताप्लेजुङमा उत्पादित अलैँची, अदुवा, चिया, जडीबुटी र तरकारी बालीले पछिल्लो समय भारतीय बजारमा उच्च मागसँगै राम्रो मूल्य पाउने गरेको छ । यद्यपि, लसुन, आलु, कोदो, ताजा तरकारी र फलफूलमा भारतीय निर्भरता अझै घट्न सकेको छैन ।










