पथरी, पुस २३
देवताका रुपमा रहेका आफ्ना बाबुआमाको महानतालाई कसरी चिरस्थायी राख्ने भन्नेमा विभिन्न मानिसले विभिन्न तरिका अपनाएका हुन्छन् । त्यसमध्येमा मोरङको पथरीशनिश्चरे १ का अर्जुनकुमार बुढाथोकीले बाबुआमालाई आफूले पढाउने विद्यार्थीका माध्यमबाट चिरकालसम्म जिवित राख्ने योजना बनाउनु भयो ।
अर्थात स्थानीय पञ्चायत माविका प्रधानाध्यापक उहाँले भौतिक रुपमा विदा हुनु भएका बाबु प्रेम र आमा गीताको स्मृतिमा एक लाख ११ हजार १११ रुपैयाँको ‘प्रेमगीता स्मृति अक्षकोष’ स्थापना गर्नुभयो । त्यसको व्याज वर्षेनी विद्यार्थीको हितका काममा खर्चिने योजना अनुरुप पहिलो वर्ष उहाँले बाल कक्षाका सम्पूर्ण ५० जना विद्यार्थीलाई न्यानो कपडाका रुपमा ट्रयाक सुट वितरण गर्नुभयो ।
विद्यालयलाई पूर्वकै अग्रणी बनाउने कुरामा विशेष योगदान पुरयाउँदै आउनु भएका प्रधानाध्यापक बुढाथोकीले उहाँकी श्रीमती शिक्षिका गोमादेवी पौडेल बुढाथोकीसँगको सहकार्यमा अक्षयकोषको व्याजबाट प्राप्त ११ हजार र त्यसमा २४ हजार थपेर विद्यालय पोशाकको ट्रयाक सुट वितरण गरेर विद्यार्थीलाई जाडोमा न्यानो पार्नु भयो ।
कक्षा नर्सरी र केजीमा अध्ययनरत ती विद्यार्थीहरु ट्रयाक सुट पाएर निकै खुसी भए । कार्यक्रममा प्रधानाध्यापक अर्जुनकुमार बुढाथोकी, शिक्षिका गोमादेवी पौडेल बुढाथोकी, विद्यालय व्यवस्थापन समितिका सदस्य रामप्रसाद ग्यावा तामाङका साथमा शिक्षक, कर्मचारी तथा विद्यार्थीहरुको उपस्थिति रहेको थियो ।
