दमक, माघ ६
झापाको दमकसहित कोशी प्रदेशका पाँच स्थानमा घुम्तीका रुपमा यो पटक आयोजना भएको ‘काठमाडौं इन्टरनेशनल फिल्म फेस्टिभल’ (किम्फ) ले स्थानीय कलाप्रेमीलाई उत्साह जगाएको छ ।
इलामको फिक्कल र झापाको सुरुङ्गापछि कदम थिएटर दमकमा दुईदिने फेस्टिभलमा प्रदर्शित छोटा कलात्मक अनि गहन चलचित्र र डकुमेन्ट्री हेरिसकेपछि कलाप्रेमीलाई केही गर्ने उत्साह जागेको छ ।
चलचित्र र डकुमेन्ट्री हेरिसकेपछि सृजना क्षेत्रसँग नजिक दमक बहुमुखी क्याम्पसका विद्यार्थी सविन गौतमले काठमाडौं बाहिरसमेत भएका यसखाले महोत्सवले युवा पुस्तालाई उर्जा भरेको र समाज रुपान्तरणका लागि सन्देश दिएको प्रतिक्रिया दिनु भयो ।
शनिबार र आइतबारको महोत्सवमा पहिलो दिन नान्सीको निर्देशनको ‘पासाङ इन द स्याडो अफ एभरेष्ट’, अनिल कुर्मीको निर्देशनको ‘फेरा’, विज्ञान सापकोटाको निर्देशनको ‘गणेश एलिफस मेक्सिमम’, विकास न्यौपानेको ‘लक्ष्मनीया’, प्रान्नि लिम्बू निर्देशित ‘उर्मी’ प्रदर्शन भएको छ ।
त्यस्तै, दोस्रो दिन आकांक्षा कार्कीले निर्देशन गरेको ‘सनही’, सरला थापा निर्देशित ‘ब्रिटेनका एक्का गोर्खाहरु’, सफल पाण्डे निर्देशित ‘अर्केष्टा’, किरण श्रेष्ठको ‘एट अनोदर विन्टर’, ऐश्वर्य बैदारको ‘ह्वेयर वाटर हाइसेन्थ ग्रो’ र एलेन जिस्पोनरको ‘हाइडी’ प्रस्तुत भयो ।
सन् २००० देखि चलचित्रको गहन मर्मलाई उजागर गर्दै आर्ट मूभिलाई प्रोत्साहन गर्न नेपालीलगायतका चलचित्रको महोत्सव गर्दै आएको किम्फले यो वर्ष घुम्ति कार्यक्रमका रुपमा इलामको फिक्कल र झापाको दमकमा महोत्सव सक्यो । सोमबार र मंगलबार धरानमा अनि त्यसपछि इटहरीमा महोत्सव गर्दैछ । कोरोनापछि भनें पहिलो पटक अर्थात समग्र २१ औं श्रृंखला अघि बढाएको किम्फका बोर्ड अफ डाइरेक्टर शेखर खरेलले जानकारी गराउनु भयो । सृजनात्मक चलचित्र क्षेत्रमा केही गर्न चाहनेकालागि किम्फले आर्थिक व्यवस्थापन समेत गर्ने गरेको उत्साहप्रद सन्देश समेत प्रवाह गर्नुभयो ।
आर्ट मूभिमा दख्खल राख्दै आउनु भएका निर्देशक नवीन सुब्बाले ‘सिनेमामा संघीयता’ विषयमा आफ्नो धारणा राख्दै अन्तरक्रियात्मक कार्यक्रम अघि बढ्यो ।
कदम थिएटरले चलचित्र महोत्सवको आयोजना गरेर कलाप्रेमीलाई केही न केही दिन सकेको थिएटरका अध्यक्ष एवम् प्रशिद्ध चलचित्र कलाकार हेमन्त बुढाथोकीको भनाई छ ।
