रेनोल्ड्सबर्ग (ओहायो), माघ २२
आप्रवासी नेपाली गीतकार संघ (इन्ला युएसए) को पहिलो वार्षिक सम्मेलन भव्य रूपमा सम्पन्न भएको छ ।
सम्मेलनमा नेपाली गीत–संगीत क्षेत्रमा अतुलनीय योगदान पुर्याउने स्रष्टाहरूलाई सम्मान गर्दै इन्ला ज्ञानेन्द्र गदाल गीत सम्मानको अनुमोदन गर्दै यस वर्षको सम्मान वरिष्ठ गीतकार एवं अभिनेता नीर शाहलाई प्रदान गरिएको छ ।
संघका अध्यक्ष हरि उप्रेतीले दोसल्ला ओढाई ४१ हजार १ र सम्मानपत्र प्रदान गर्दै, विशिष्ट अतिथि एवं संरक्षकहरूको उपस्थितिमा शाहलाई सम्मान गर्नुभयो । साथै, गङ्गाराम लामिटारे, प्रताप सुब्बा, भूषण खरेल, डा. दामोदर पौडेल र मुकेश सिंहलाई समेत संघले साहित्य र संगीतमा उच्च योगदानको कदर गर्दै सम्मान गरेको थियो ।
कार्यक्रमका विशेष आकर्षणमध्ये एक आजीवन सदस्यता सम्मान समारोह रह्यो, जसमा संघले विभिन्न प्रतिष्ठित सर्जकहरूलाई आजीवन सदस्यता प्रदान गर्दै सम्मान गर्यो । आजीवन सदस्यता पाउनेहरुमा पातलो अन्तरे, खडानन्द अधिकारी, तिलचन आचार्य, खेम रिजाल, गण्डकी पुत्र, चरण बजगाईं, आरबी खड्का, शेखर कोइराला, हेमकुमार क्षेत्री, केदार उप्रेती, नरेन न्यौपाने, गंगा अविलाशी, डा. चन्द्र गिरी र मनोज राई रहनु भएको छ ।
मनोरञ्जनात्मक प्रस्तुति र सांगीतिक माहोल
सम्मेलनको उद्घाटन नेहा फुयाल र रस्मिका खनालको स्वागत नृत्यद्वारा गरिएको थियो । त्यस्तै, अर्जुन रसाईली, मनोज ढकाल, सुचिता गुरुङ, चरन बजगाईं, हेमकुमार क्षेत्री, खडानन्द अधिकारी लगायतका कलाकारहरूले सांगीतिक प्रस्तुति दिए । एनसीडीसीका कलाकारहरूले समेत बेजोड नृत्य प्रदर्शन गर्दै कार्यक्रममा मनोरञ्जन प्रदान गरे ।
साधारणसभा गायक एवं संगीतकार मनोज राईको अध्यक्षतामा सम्पन्न भयो । सभाले वार्षिक गतिविधि, आर्थिक प्रतिवेदन, भविष्यका कार्ययोजना तथा इन्ला ज्ञानेन्द्र गदाल गीत सम्मानलाई अनुमोदन गरेको थियो ।
