दमक, फागुन ८
उच्च माद्यमिक विद्यालयहरुको संगठन हिसानको कोशी प्रदेश कमिटीले आयोजना गरेको भलिबल प्रतियोगिता सम्पन्न भएको छ ।
झापाको दमकस्थित आस्था कलेज अफ म्यानेजमेण्टको प्राङ्गणमा बिभिन्न समुहगत प्रतिस्पर्धा भएको थियो । सो क्रममा छात्र तर्फको प्रतियोगितामा मोरङको विराटनगरस्थित कान्तिपुर सेकेण्डरी स्कुल प्रथम भएको छ भने बिर्तामोडस्थित आदर्श स्कुल अफ म्यानेजमेण्ट उप बिजेता बनेको छ ।
यसैगरी, छात्रा तर्फ सुनसरी धरानको पूर्वाञ्चल सेकेण्डरी स्कुल प्रथम भएको छ भने बिर्तामोडस्थित आदर्श स्कुल अफ म्यानेजमेण्टनै उपविजेता बनेको हिसान झापाका अध्यक्ष टेकनाथ भण्डारीले जानकारी दिनुभयो ।
प्रतियोगिताका बिजेतालाई दमक नगरपालिकाका प्रमुख रामकुमार थापा, हिसानका केन्द्रीय उपाध्यक्ष भेषराज पोखरेल, हिसान सुनसरी अध्यक्ष सागर भट्टराई, आस्था कलेज अफ म्यानेजमेण्टका उपाध्यक्ष टंक सिटौला, क्याम्पसका सहायक प्रमुख टिकाराम अधिकारी लगायतले पुरस्कार, मेडल र प्रमाणपत्र प्रदान गर्नु भएको थियो ।
हिसान झापाका अध्यक्ष एवम् कार्यक्रम संयोजक टेकनाथ भण्डारीले प्रतियोगिताले विद्यार्थीहरुको सृजनशीलतामा टेवा पुग्ने भएकोले बिभिन्न ठाउँमा यस खाले प्रतियोगिता हिसानले गरिरहेको जानकारी दिनुभयो ।
प्रतियोगितामा ३ जिल्लाबाट १२ विद्यालयका विद्यार्थी सहभागी भएका थिए ।
