विराटनगर । राष्ट्रिय सभामा एक महिनापछि रिक्त हुन लागेका १९ सदस्यका लागि आज भएको निर्वाचनमा एमाले क्लिन स्वीप हुनबाट जोगिएको छ ।
सबै प्रदेशमा बहुमतमा रहेको गठबन्धनका उम्मेद्वार प्रदेश १ मा १ जना बाहेक सबैले जित्न सफल भए । निर्वाचन आयोगले दिएको परिणाम अनुसार प्रदेश १ मा अल्पसंख्यक कोटामा एमालेका सोनाम ग्याल्जेन शेर्पा विजयी भए । अन्य सबै पदमा गठबन्धनका उम्मेद्वार विजयी बने ।
बागमती प्रदेशतर्फको दुवै सिटमा गठबन्धनका उम्मेदवार विजयी भए । जसमा नेकपा एकीकृत समाजवादीकी गोमादेवी तिमल्सिना र अन्यमा कांग्रेसका कृष्णप्रसाद पौडेल विजयी भएका हुन् ।
यस्तै कर्णाली प्रदेशमा भएको राष्ट्रियसभा निर्वाचनमा पनि सत्तारुढ गठबन्धनका तीनैजना उम्मेदवार विजयी भए । राष्ट्रिय सभा सदस्यका तीन रिक्त पदमा भएको निर्वाचनमा एमालेका उम्मेदवारलाई हराउँदै गठबन्धनका उम्मेदवार कांग्रेसकी दुर्गाकुमारी गुरुङ, नेकपा माओवादी केन्द्रका नरबहादुर विष्ट र नेकपा एकीकृत समाजवादीका उदय बोहरा विजयी भएका हुन् ।
यस्तै गण्डकी प्रदेशमा पनि सत्तारुढ गठबन्धनका उम्मेदवारहरु निर्वाचित भएका छन् । विजयी हुनेमा नेकपा माओवादी केन्द्रका सुरेशबहादुर आले मगर, भुवन सुनार र नेपाली कांग्रेसकी कमला पन्त निर्वाचित भएका हुन् ।
यसैगरी प्रदेश १ बाट राष्ट्रियसभाको अन्यतर्फको सदस्यमा नेपाली कांग्रेसका गोपाल बस्नेत निर्वाचित भए भने महिलातर्फ नेकपा एकीकृत समाजवादीकी जयन्ती राई निर्वाचित भएकी छन् । अल्पसंख्यकतर्फ भने एमालेका सोनम ग्याल्जेन शेर्पा विजयी भए ।
यस्तै लुम्बिनी प्रदेशबाट गठबन्धनका तर्फबाट काँग्रेसका युवराज शर्मा, नेकपा एकीकृत समाजवादीका राज्यलक्ष्मी गैरे र राष्ट्रिय जनमोर्चाका तुलप्रसाद बिक (राजेश) विजयी भए ।
सुदूरपश्चिम प्रदेशबाट राष्ट्रिय सभा सदस्यमा सत्तारुढ गठबन्धनका उम्मेदवार निर्वाचित भएका छन् । गठबन्धनकातर्फबाट माओवादीका जगत पार्की, नेकपा एकीकृत समाजवादीकी गरिमा शाह र काँग्रेस नारायण मिश्र विजयी भए ।
यस्तै मधेश प्रदेशबाट राष्ट्रियसभा सदस्य निर्वाचनमा नेकपा माओवादी केन्द्रकी उर्मिला अर्याल र जसपाका मोहम्मद खालिद सिद्दिकी विजयी भएका छन् ।
आगामी फागुन २० गते नेकपा एमालेका ८, नेकपा एकीकृत समाजवादीका ४, नेकपा माओवादी केन्द्रका ४ र नेपाली कांग्रेसका ३ राष्ट्रियसभा सदस्यको पदावधि समाप्त हुँदैछ ।
निर्वाचनमा नेपाली कांग्रेस, नेकपा एमाले, नेकपा माओवादी केन्द्र, नेकपा एकीकृत समाजवादी, राष्ट्रिय जनमोर्चा, लोकतान्त्रिक समाजवादी पार्टी, नेपाल मजदुर किसान पार्टी, जनता समाजवादी पार्टी र राष्ट्रिय प्रजातन्त्र पार्टी गरी ९ दलका ४३ जना उम्मेदवार थिए ।
