पथरी, फागुन १५
मोरङको पथरी शनिश्चरे वडा नम्बर १ मा रहेको अन्नपूर्ण माध्यमिक विद्यालयले आफ्नो ३४ औँ अभिभावक दिवस तथा वार्षिकोत्सव बिहीबार भव्यताका साथ मनाएको छ । विद्यालयले आफ्नै प्राङ्गणमा विभिन्न कार्यक्रमहरूको आयोजना गर्दै वार्षिकोत्सव मनाएको हो ।
पथरी शनिश्चरे वडा नम्बर १ का वडा अध्यक्ष भीमकुमार राईको प्रमुख आतिथ्यता सम्पन्न कार्यक्रममा बोल्दै वडा अध्यक्ष राईले सो विद्यालयबाट अध्ययन गरेका विद्यार्थीहरु देशका विभिन्न जिम्मेवार स्थानमा पुगेर आफूलाई अब्बल साबित गरेको र असल नागरिकको रुपमा स्थापित भएको भन्दै विद्यालयको योगदानको प्रशंसा गर्नुभयो ।
सो अवसरमा पथरी शनिश्चरे नगरपालिकाका शिक्षा, युवा तथा खेलकुद शाखाका प्रमुख नवीन खुलाल बुढाथोकीले अन्नपूर्णले ३४ वर्ष अघिदेखि शैक्षिक क्षेत्रमा ठूलो योगदान पुर्याएर शैक्षिक गुणस्तर हासिल गरेको भन्दै प्रशंसा गर्नुभयो ।
कार्यक्रममा विभिन्न तह र कक्षाका बालबालिकाहरूले सांस्कृतिक भेषभूषामा आकर्षक नृत्यहरू पस्केका थिए । सोही अवसरमा विद्यालयमा दुई दशकभन्दा बढी शिक्षण सेवा गरी अवकाश लिनुभएका पूर्व शिक्षक तुलसीराम तिम्सिनालाई दोसल्ला ओढाएर सम्मानित गरिएको थियो । यसैगरी, विभिन्न विधामा विजयी विद्यार्थीहरूलाई मेडल, प्रमाणपत्रसहित पुरस्कृत समेत गरिएको थियो ।
विद्यालयका निर्देशक मदनबहादुर थापाको अध्यक्षतामा सम्पन्न सो कार्यक्रममा विद्यालयका प्रधानाध्यापक वीरेन्द्र गुरुङले विद्यालयको आगामी शैक्षिक योजनाहरू प्रस्तुत गर्नुभएको थियो ।
नगर प्याब्सन पथरी शनिश्चरेका अध्यक्ष सन्तोष बस्नेत, विद्यालय सञ्चालक भम्पर थापा, विद्यालयका संयोजक सुरेश थापा, शिक्षक अभिभावक सङ्घको अध्यक्ष हेमबहादुर श्रेष्ठ, तथा सदस्यहरू जेसिका बस्नेत, कला मगरलगायतको उपस्थिति रहेको थियो । स्वागत मन्तव्य रामचन्द्र रानाले गर्नुभएको सो कार्यक्रमको सञ्चालन विद्यालयका शिक्षक प्रकाश धिमालले गर्नुभएको थियो ।
