दमक, फागुन १९
विहे तथा ब्रतवन्धकालागि सजावटका सामग्रीको आवश्यकता बढ्दो छ । अझ आकर्षक देखिने प्रकारका सामग्री खोज्ने रुची जो कोहीको हुन्छ । युवा पुस्ताले त अझ विभिन्न सञ्चारमाध्यममा हेरेर पनि आकर्षक खाले सजावटका सामग्री खोज्ने गरेका छन् ।
यसप्रकारको सजावटको सामग्री निर्माणको आवश्यकतालाई महसुस गर्दै दमकस्थित सृजनशील नारी एकता समाजले त्यस्ता सामग्री निर्माण सम्बन्धी तालिम दिने योजना बनायो । त्यसमा दमकको ९ नम्बर वडा कार्यालयमा पेश भएको प्रस्तावनापछि कार्यक्रम स्वीकृत भएर १५ दिने तालिम अघि बढ्यो । वैदेशिक रोजगारीका क्रममा भेटिएका महिला साथीहरुले आफ्नै देशमा सीपमूलक केही कार्यक्रम अघि बढाउने योजना बनाएर नेपाल आएपछि २ वर्षअघि संस्था दर्ता गरेर यसखाले कार्यक्रम अघि बढाइएको सृजनशील नारी एकता समाजकी अध्यक्ष मालता गोलेले जनाउनु भयो ।
यसखाले तालिमले नेपाली मौलिकतासँग जोडिएको सामग्री निर्माण सम्बन्धी महिलाहरुको सीप प्रवद्र्धनमा भूमिका खेलेकोमा ९ नम्बर वडाध्यक्ष कुवेरप्रसाद भट्टराईले खुसी व्यक्त गर्नुभयो । तालिम समापनका अवसरमा बोल्दै उहाँले मौलिकता समेत जोगाउने तथा सृजनशीलताको विकासका योजनामा वडाले सक्दो सघाउने उल्लेख गर्नुभयो ।
फागुन ४ देखि १९ गतेसम्म सञ्चालित तालिमले ढाकी, डालो, किस्ती, ठेकी, पिरासहितका सामग्री निर्माण गर्न सिकाएको तालिम प्रशिक्षक साथी क्रियशन उर्लाबारीकी उमादेवी पौडेलले जानकारी गराउनु भयो ।
सजावटका सामग्री निर्माणको तालिमले आफूहरुलाई केही गर्ने बाटो देखाएको भन्दै प्रशिक्षार्थीहरु पवित्रा कार्की अधिकारी,
गीता कार्की चुडाल लगायतले खुसी व्यक्त गरेका छन् ।
वडाका महिलाहरुलाई सीप सिकाएर आत्मनिर्भरतातर्फ उन्मुख गर्ने योजनामा वडा कार्यालयले सो तालिमकालागि ५० हजार रुपैयाँ विनियोजन गरेको छ ।
