दमक, फागुन २०
हामीलाई चटनीका रुपमा खानामा अचारको स्वादले रौनकता प्रदान गर्छ । खानामा चाँही स्वाद चाहिने तर उत्पादन गर्न भनें अल्छि गर्ने प्रवृत्ति छ । कृषि प्रधान देश नेपालमा अचार समेत विदेशबाट भित्रिने विडम्बना छ । करेसाबारी तथा खेतबारीमा अचार निर्माणकालागि आवश्यक कृषिजन्य बस्तुको उत्पादनको त्यस्तो समस्या छैन । तर मात्र जाँगरको कमि छ ।
यही कुरालाई दृष्टिगत गरी झापाको दमक ५ नम्बर वडा कार्यालयले कम्तिमा पनि वडाबासीले आफ्नै स्रोत र साधन व्यवस्थापन गरेर अचार उत्पादन गर्दै आत्मनिर्भरतातर्फ उन्मुख हुने सन्देश दिन अचार बनाउने तालिम राख्यो । महिलाहरुकालागि अचारसँगै आलु चिप्सको समेत गरी ५ दिने तालिम सम्पन्न गरेको छ ।
कार्यक्रममा बोल्दै दमक नगर उपप्रमुख रेगिना भट्टराई प्रसाईंले महिलाहरु आत्मनिर्भर बन्न थोरै लगानीमा पनि गर्न सकिने यसखाले कार्यक्रम आवश्यक रहेको उल्लेख गर्नुभयो । उहाँले बजारमा अचारको माग रहेको अवस्थामा अर्गानिक प्रकारको अचार उत्पादन गर्नु आवश्यक रहेको कुरामा जोड दिनु भयो ।
तालिमपछि सहभागिलाई प्रमाणपत्र वितरण गरिएको कार्यक्रममा बोल्दै दमक ५ का अध्यक्ष इन्द्रबहादुर गुरुङले स्थानीयको माग अनुसार यसखाले तालिमको आयोजना गरिएको प्रष्ट्याउनु भयो ।
वडा सदस्य शोभा बेलबासेले आफूले पाएको सीपलाई सदुपयोग गरी आत्मनिर्भर रोजगारमूलक बन्न प्रशिक्षार्थीहरुलाई अनुरोध गर्नुभयो ।
तालिममा सहभागिहरुले पनि आफूहरुले अचार बनाउने सीप सिक्न पाएकोमा खुसी व्यक्त गरेका छन् । अचार बनाउने कुरामा आफूहरु लागिपर्ने प्रशिक्षार्थीमध्येकी विन्दा कट्टेल र सजना भट्टराईले धारणा राख्नुभयो ।
अर्ल इलेक्ट्रोनिक्स एण्ड टेक्निकल इन्स्टिच्यूट इटहरी सुनसरीको प्राविधिक सहयोगमा तालिम सम्पन्न भएको हो ।
