पथरी, फागुन २४
मोरङको पथरी शनिश्चरे वडा नं २ मा रहेको पथरी खानेपानी तथा सरसफाई उपभोक्ता संस्थाको बोक्रेचोकस्थित जलवायु अनुकूलित खानेपानी आयोजनाको शिलान्यास भएको छ ।
शनिबार संघीय खानेपानी तथा ढल व्यवस्थापन मन्त्री प्रदीप यादवले एक कार्यक्रमका बीच शिलान्यास गर्नुभएको हो ।
शिलान्यास गर्नुहुदै मन्त्री यादवले भन्नुभयो “पथरी शनिश्चरे नगरपालिकाको खानेपानी समस्या समाधानका लागि पहिलो चरणमा नेपाल सरकारको खानेपानी तथा ढल व्यवस्थापन मन्त्रालयबाट ३५ करोड रुपैयाँ बराबरको बजेट विनियोजन गरिएको छ । नागरिकलाई घर घरमा स्वच्छ तथा शुद्ध खानेपानी उपलब्ध गराउने सरकारको दायित्वमा सोको लागि आफूले सक्दो प्राथमिकता दिएर बजेट विनियोजन गरिएको छ ।’
यसैगरी, खानेपानी तथा ढल व्यवस्थापन विभागका महानिर्देशक रामकुमार श्रेष्ठले पथरी शनिश्चरे नगरपालिका क्षेत्रका स्वच्छ खानेपानी उपलब्ध गराउन संघीय मन्त्रालय र विभागले उच्च प्राथमिकता दिएको बताउनुभयो ।
सोही अवसरमा पथरी शनिश्चरे नगरपालिकाका प्रमुख मोहनप्रसाद तुम्बापोले यस आयोजनाले नगरपालिकाका ७ वटा वडाहरुका नागरिकहरूले स्वच्छ खानेपानी उपभोग गर्न पाउनुहुने जनाउनु भयो ।
पथरी खानेपानी तथा सरसफाइ उपभोक्ता संस्थाका अध्यक्ष जयराम बिष्टको अध्यक्षतामा सम्पन्न भएको कार्यक्रममा संघीय खानेपानी तथा ढल व्यवस्थापन कोशी प्रदेश आयोजना प्रमुख सुखलाल चौधरी, वडा नं २ का वडाध्यक्ष नैना साम्पाङ्ग राई, वडा नम्बर ३ का वडाध्यक्ष विजय लिम्बु, अन्य वडाका जनप्रतिनिधिहरू तथा राजनीतिक दलका प्रतिनिधिहरुको पनि उपस्थिति रहेको थियो । सो खानेपानी आयोजना निर्माण सम्पन्न भएपछि नगरभित्रका वडा नम्बर १, २, ३ ,५, ६, ७ र १० लाई शुद्ध खानेपानी उपलब्ध हुने बताइएको छ ।
