दमक, फागुन २५
रोजगारीका सिलसिलामा प्रत्येक वर्ष लाखौं नेपाली विदेश जाने गरेका छन् । नेपालमै रोजगारको वातावरण बन्न नसक्दा युवाहरु रोकिने अवस्था अझै छैन । अर्काको देशमा पसिना बगाएपनि त्यहाँ सिकेको सीप अनि बुझ्न पाएको श्रमको महत्वका सन्दर्भमा भनें महत्वपूर्ण उपलब्धि मान्न सकिन्छ । नेपाल फर्किएपछि त्यही सीपलाई देश निर्माणमा सदुपयोग गर्ने भन्ने हिसाबले विभिन्न दल निकटहरु संगठित हुने र कार्यक्रमहरु अघि बढाउने क्रम बढको छ । यस क्रममा नेपाली कांग्रेस निकटहरु संगठित भएर देशव्यापी कार्यक्रम अघि बढाइरहेका छन् ।
पूर्व आप्रवासी समन्वय विभाग केन्द्रीय समिति गठन गरिएको छ । पछिल्लो पटक कोशी प्रदेशको कार्यक्रम झापाको बिर्तामोडमा सम्पन्न भएको छ । पूर्व आप्रवासी समन्वय विभाग केन्द्रीय समितिको आयोजना र कोशी प्रदेश समितिको संयोजनमा बिर्तामोडमा आयोजित ‘स्वदेशदेखि विदेशसम्म’ विषयक २ दिने अन्तरक्रिया कार्यक्रम नेपाली कांग्रेसका नेता डा. शेखर कोइरालाको प्रमुख आतिथ्यता रहेको थियो । अदक्ष कामदार, दक्ष जनशक्ति र अध्ययन गरी तीन प्रकृतिमा नेपालीहरु विदेशिने गरेको चर्चा गर्दै उहाँले विदेशमा सीप र दक्षता हासिल गरेका ब्यक्तिहरुको सीप, क्षमता र पैसा नेपालमा लगानी गर्नसके देश विकास सम्भव भएको भनाई राख्नुभयो ।
यसअघि नेता कोइरालालाई दमकमा कांग्रेस पार्टी नेता, कार्यकर्ताहरुले स्वागत गरेका थिए ।
अवसरको खोजीमा युवा पुस्ता विदेशिनु स्वाभाविक भएपनि उनीहरुलाई स्वदेश फर्काएर सीप र सिर्जनाको उपयोग गर्ने नीति राज्यले लिनुपर्ने कार्यक्रमको जोड थियो ।
कांग्रेस महासमिति सदस्य एवम् पूर्व आप्रवासी विभागका केन्द्रीय सदस्य तथा कोशी संयोजक विज्ञानराज प्रसाईंले यसखाले नीतिको निर्माण गर्न आवश्यक देखिएकाले पूर्व आप्रवासी समन्वय विभागको आवश्यकता खड्किएको जनाउनु भयो । उहाँले प्रदेशस्तरमा पनि समिति निर्माणको प्रक्रिया अघि बढाइएको उल्लेख गर्नुभयो । पूर्व आप्रवासी विभागलाई पार्टीको भ्रातृ संगठननै बनाउने तयारीमा पहिलो चरणमा प्रदेशस्तरीय कार्यक्रम सञ्चालन अघि बढाएको जनाउनु भयो ।
कार्यक्रममा पूर्व आप्रवासीहरुको तथ्याङ्क संकलन, उनीहरुमा रहेको सीप र क्षमताको उपयोग कसरी गर्न सकिन्छ भन्ने विषयमा अन्तरक्रियात्मक छलफल भएको र छलफलमा उठेका विषयवस्तुको दस्तावेज बनाएर पार्टी केन्द्रीय समितिमा बुझाइने बताइएको छ ।
विभिन्न देशमा रोजगार गरेर फर्किएका नेपाली कांग्रेसमा आस्थावानहरुले २ महिना अघिदेखि विभाग गठन गरी तथ्यांक संकलनसमेतको कार्यक्रम अघि बढाएको नेपाली कांग्रेस सांस्कृतिक महासंघका केन्द्रीय सदस्य बालकृष्ण निरौलाले बताउनु भयो ।
प्रदेशहरुमा पूर्व आप्रवासीको तथ्यांक संकलन तथा कार्यक्रमको बारेमा जानकारी गराउने क्रममा पाँचौं कार्यक्रमका रुपमा बिर्तामोडमा अन्तरक्रिया गरिएको हो ।
