दमक, फागुन २६
दमक नगर क्षेत्रमा युवाहरुलाई स्वरोजगार बनाउने प्रकारका निःशुल्क तालिमहरु वडा वडामा अघि बढाइएका छन् । यसमा कफि बनाउने बारिस्ता तालिममा युवाहरुको रुची बढेको छ । यसक्रममा दमकका केही वडाले बारिस्ता तालिम सञ्चालन गरेका छन् । वडा नम्बर ५ ले त लगातार २ वर्षदेखि बारिस्ता तालिम सञ्चालन गरेर सो क्षेत्रमा इच्छुक युवाहरुलाई सीपयुक्त बनाएको छ ।
गत वर्ष बारिस्ता तालिमको अवसर प्रदान गर्दा ७० जना तालिममा सहभागि भए । उनीहरु धेरैजसो बारिस्ताको जनशक्तिका रुपमा विदेशमा र केही स्वदेशमा राम्रै कमाई गरिरहेको बुझेर यो वर्ष पनि सोही तालिम सञ्चालन गरिएको ५ नम्बर वडाध्यक्ष इन्द्रबहादुर गुरुङको भनाई छ ।
स्थानीय चन्द्रसूर्य सीप विकास संस्थाको प्राविधिक सहयोगमा सञ्चालित तालिमका प्रशिक्षक आकाश खड्काले बारिस्ता तालिमले जागिरखाने अवसरको ढोका खोल्ने गरेको जनाउनु भयो ।
१५ दिने तालिममा सहभागिहरुले आफूहरुले सिकेको तालिमबाट केही गर्न सकिने उत्साह बढेको प्रशिक्षार्थी अस्मिता खड्का कुमाल, विभिषा महतसहितले बताउनु भयो ।
वडाले १ लाख ५० हजार रुपैयाँको बजेटमा ४५ जनाकालागि तालिम सम्पन्न गरेको छ ।
