बैङ्कक, चैत २० / नेपाल र थाइल्याण्डबीच आठ वटा समझदारीपत्रमा हस्ताक्षर भएको छ ।
बुधबार नेपालका प्रधानमन्त्री केपी शर्मा ओली र थाइल्याण्डका प्रधानमन्त्री पे थोङ् थान् शिनावातबीच राजधानी बैङ्ककमा भएको भेटवार्ताका क्रममा आठ वटा समझदारीपत्रमा हस्ताक्षर भएको राससले जनाएको छ ।
भेटवार्तामा नेपालमा हवाई र पर्यटनका क्षेत्रमा आफ्नो देशका तर्फबाट लगानी र सहभागिता वृद्धि हुने बताउँदै हवाई र पर्यटनसहितको क्षेत्रको सहकार्यको सम्भौतापत्रमा हस्ताक्षर गरेको जनाउनु भयो ।
दुईपक्षीय भेटवार्तापछि आयोजित संयुक्त पत्रकार सम्मेलनमा उहाँले काठमाडौँमा थाइ एयरलायन्सको उडान सङ्ख्या वृद्धि गर्न र लुम्बिनीमा सिधा हवाई उडानका लागि थाइल्याण्ड सकारात्मक रहेको बताउनु भएको छ । यसक्रममा उहाँले नेपालमा ऊर्जा, होटेल, हवाइजस्ता पर्यटन क्षेत्रमा थाइल्याण्डको लगानी र व्यापारका विषयले आगामी दिनमा प्राथमिकता पाउने विश्वास व्यक्त गर्नुभयो ।
प्रधानमन्त्री शिनावातले कूटनीतिक सम्बन्ध बिस्तार भएको ६५ वर्षपछि नेपालका प्रधानमन्त्रीबाट भएको पहिलो भ्रमण ऐतिहासिक रहेको उल्लेख गर्दै दुई देशबीचको ‘कनेक्टिभिटी’ र व्यापारिक साझेदारी बढाउने विषयमा पनि आफूहरुबीच छलफल भएको जानकारी जनाउनु भयो ।
के के भए समझदारी ?
दुई देशका सरकारी पक्षबीच दुईवटा र गैरसरकारी पक्षबीच छवटा समझदारीपत्रमा हस्ताक्षर भएको छ ।
दुवै देशका प्रधानमन्त्रीको समुपस्थितिमा सरकारी तवरबाट संस्कृति तथा पर्यटनका क्षेत्रमा दुईवटा समझदारी भएको छ भने गैरसरकारी क्षेत्रबीच विभिन्न छ वटा विषयका समझदारीपत्रमा हस्ताक्षर भएको छ । नेपाल सरकारको तर्फबाट परराष्ट्रमन्त्री डा आरजु राणा देउवा र थाइल्याण्डका संस्कृतिमन्त्री सुडवान वाङसुफाकिज्कोसोलले सांस्कृतिक क्षेत्रमा सहकार्यसम्बन्धी समझदारीपत्रमा हस्ताक्षर गर्नुभएको छ ।
त्यस्तै, परराष्ट्रमन्त्री डा. देउवा र थाइल्याण्ड सरकारका पर्यटन तथा खेलकुदमन्त्री सोरावाङ तियनथोङले पर्यटन क्षेत्रमा सहकार्यसम्बन्धी समझदारीपत्रमा हस्ताक्षर भयो ।
नेपाल नेत्र ज्योति सङ्घ र थाइल्याण्डको महिदोल विश्वविद्यालयअन्तर्गतको रामाथिवोदी अस्पतालबीच सहकार्यसम्बन्धी समझदारीपत्रमा हस्ताक्षर भएको छ । जनता एग्रो एण्ड फरेस्ट्री नेपाल (जेएएफएल) र कासेटसार्ट विश्वविद्यालय थाइल्याण्ड र नेपाल उद्योग वाणिज्य महासङ्घ (एफएनसीसीआई) र थाइल्याण्डको व्यापार बोर्डबीचको समझदारीपत्रमा पनि हस्ताक्षर भएको छ ।
समझदारीका क्रममा काठमाडौँ विश्वविद्यालय र थाइल्याण्डको सियाम विश्वविद्यालय सहकार्यसम्बन्धी पत्रमा पनि हस्ताक्षर भएको छ । नेपाल उद्योग परिसंघ र थाइ उद्योग महासङ्घबीच सहकार्यसम्बन्धी सम्झौतापत्रमा समझदारी तथा नेपाल चेम्बर अफ कमर्स र थाइल्याण्ड पर्यटन परिषद्बीच अर्को समझदारीपत्रमा हस्ताक्षर भएको नेपाल सरकारले जनाएको छ ।
आपसी सम्बन्ध नयाँ उचाईमा पुगेको छ : प्रम ओली
संयुक्त पत्रकार सम्मेलनमा प्रधानमन्त्री ओलीले भेटवार्ताबाट दुई देशबीचको सम्बन्धले नयाँ उचाई लिएको बताउनु भएको छ । भ्रमणबाट दुई मुलुकबीच संस्कृति, पर्यटन, शिक्षा, ऊर्जालगायतका क्षेत्रमा सहकार्य अभिवृद्धि हुने विश्वास व्यक्त गर्नुभयो ।
