दमक, चैत २० / विद्यालय शिक्षा विधेयकलाई यथाशीघ्र ऐन जारी गर्न माग गर्दै आन्दोलन गर्दै आएको नेपाल शिक्षक महासंघले आजबाट काठमाडौं केन्द्रित आन्दोलन थालेको छ ।
बुधबार दिउँसो हजारौं शिक्षक तथा कर्मचारीहरू माइतीघरमण्डलदेखि नयाँबानेश्वरसम्मको सडकमा प्रदर्शन गर्दै उत्रिएका थिए । झापाबाट मात्रै १ हजारको संख्यामा शिक्षक तथा कर्मचारी आन्दोलनमा सहभागि भएको उल्लेख छ ।
गत माघ २० गतेदेखि आन्दोलनमा रहेको महासंघले ‘काठमाडौं जाऔँ अभियान’ सहित आजबाट अनिश्चितकालीन शैक्षिक आन्दोलन अघि बढाएको महासंघका अध्यक्ष लक्ष्मीकिशोर सुवेदीले जनाउनु भयो । संसदमा छलफलमा रहेको विद्यालय शिक्षा विधेयकलाई यथाशीघ्र ऐन निर्माण गरी जारी गर्न माग सहित आन्दोलन निरन्तर अघि बढाउने निर्णय भएको उहाँले बताउनु भयो ।
उहाँले भन्नुभयो ‘गुणस्तरीय विद्यालय शिक्षा, विद्यार्थी र शिक्षक कर्मचारीमैत्री अग्रगामी विद्यालय शिक्षा ऐन जारी गराउन राज्य पक्षलाई दबाब दिन आन्दोलनलाई काठमाडौं केन्द्रित गराइएको हो ।’ जिल्ला जिल्लाबाट शिक्षक तथा कर्मचारी आन्दोलनमा सहभागि हुने कार्यक्रम अनुरुप हजारौं सहभागि भएका छन् ।
आन्दोलनमा सहभागि शिक्षक तथा कर्मचारी विद्यालय शिक्षा ऐन जारी नहुँदासम्म काठमाडौंबाट नफर्किने समेत योजना बनाइएको उहाँको भनाई छ ।
