काठमाडौं, चैत २० / जनता समाजवादी पार्टी (जसपा) नेपालका प्रचार विभाग प्रमुख पूर्ण बस्नेतले संघीय लोकतान्त्रिक गणतन्त्र सर्वोत्तम प्रणाली भएकाले यसको विकल्प नहुने बताउनु भएको छ ।
बुधबार सञ्चारकर्मीसँग कुराकानी गर्दै उहाँले यसमा आ–आफ्नो विचार राख्न, सभा सङ्गठन गर्न, विरोध गर्न पाउने स्वतन्त्रता र अधिकार सबैका लागि समान हुने भन्दै यस प्रणालीमा सबै वादी अट्ने जनाउनु भयो ।
‘विगत तीन दशकदेखिको कांग्रेस र कम्युनिष्टहरुको शासनले जनतालाई प्रत्याभूति हुने गरी सुशासन, विकास, समृद्धिका लागि कार्य गर्न सकेन । जसबाट उत्पन्न भएको नैराश्यता र आक्रोशको अवस्थालाई उपयोग गरी प्रतिक्रान्तिकारी तथा प्रतिगामी शक्तिहरुले संघीय लोकतान्त्रिक गणतन्त्रात्मक शासन प्रणालीलाई नै समाप्त पार्ने षड्यन्त्र गर्न लागेको देखियो,’ बस्नेतले भन्नुभयो । उहाँले दलहरुले आफूलाई सच्याएर अघि बढ्नुपर्ने आवश्यकता औंल्याउनु भयो ।
जनआन्दोलन, जनसङ्घर्ष र जनविद्रोहको माध्यमबाट प्राप्त उपलब्धिहरुको रक्षा गर्दै थप उपलब्धिका लागि सङ्घर्ष गर्नुपर्ने उहाँको धारणा छ ।
