पथरी, २४ चैत / नेकपा एमाले पथरी शनिश्चरे मोरङको चैत २७ मा हुने दोस्रो नगर अधिवेशनबाट नेतृत्व लिने दाउमा चार जना आकांक्षी देखिएका छन् ।
जसमा बाबुराम एङ्देन, यामप्रसाद गुरागाईं, प्रकाश कार्की र सञ्जीव गिरीले आफूहरु पार्टीको अध्यक्ष बन्ने दाबी गर्नुभएको छ । यसअघि गाविस हुँदाताका एङ्देन सचिव र अध्यक्ष भइसक्नु भएका तथा अघिल्लो कार्यकालमा जनप्रतिनिधिका रुपमा वडाध्यक्ष भइसक्नु भएको छ । गुरागाईं २ नम्बर वडाको गत कार्यकालको निर्वाचित वडा अध्यक्ष र कार्की अघिल्लो कार्यकालमा ८ नम्बर वडा अध्यक्ष उठेर पराजित बन्नुभएको थियो । यी सबैभन्दा युवा उमेरका गिरी नगरमा २ वटा नगर स्तरीय फुटबल लिग प्रतियोगिता गराएर लोकप्रियता हासिल गरेका युवामा पर्नुहुन्छ । अध्यक्षका लागि एङ्देनले अलि बढी जोडबल गरिरहनु भएको छ ।
त्यसैगरी, उपाध्यक्षमा अरुणा राई, देवी राई लगायतको चर्चा छ । सचिवमा त १० जना आकांक्षी देखिएका छन् । तीर्थ आचार्य, काशिहाङ राई, अशोक साम्पाङ राई, विरोज मगर, कुलमणि गुरुङ, अनोज घिमिरे, नवीन ढकाल, पर्शुराम न्यौपाने, मणि लिम्बु, कृष्ण कार्की, भक्त राई लगायत आकांक्षी रहेको चर्चा रहेको छ । सहसचिव वा अवस्था हेरेर मुख्य ५ पदमध्ये कुनै पदमा मनोनयन दर्ता गर्न सक्ने गोविन्द भण्डारीको दाउ छ ।
विधान अनुसार अध्यक्ष, उपाध्यक्ष, सचिव र सहसचिव २ गरी एक महिलासहित ५ जना पदाधिकारी, १ देखि ९ नम्बर वडासम्म प्रति वडा ५ जनाको दरले ४५ जना, वडा नम्बर १ बाट ८ सदस्य गरेर ५३, र १७ सदस्य भूगोलबाट खुल्ला गरेर ७५ जना नगर समिति बन्ने वर्तमान नगर सचिव भीमकुमार राईले बताउनु भयो । अधिवेशनमा १७१ जना प्रतिनिधि हुनेछन् । अन्य पदमा पनि एक भन्दा बढी आकांक्षी देखिएको अवस्थामा छ । निर्वाचनमा सबै पदको सहमतिमा कमिटी चयन गराउने पार्टीको माथिल्लो कमिटीले उल्लेख गरेको छ ।
