दमक, २४ चैत । बरिष्ठ पत्रकार तथा लेखक भैरव रिसालको ९७ वर्षको उमेरमा आइतबार राति निधन भएको छ ।
मुटु र फोक्सोसम्बन्धी रोगको उपचार गराइरहनु भएका रिसालको आइतबार राति ९ बजे काठमाडौंको बानेश्वरस्थित फ्रन्टलाइन हस्पिटलमा उपचारका क्रममा रिसालको निधन भएको उहाँकी छोरी सुष्मा रिसालले जानकारी दिनुभयो । रिसालले मरणोप्राप्त शरीर दान गरेकाले शव पाटन स्वास्थ्य विज्ञान प्रतिष्ठानमा बुझाइने छ ।
उहाँको जन्म १९८५ साउन २९ गते भक्तपुरको तिथलीमा भएको थियो । रिसालले मानवअधिकारसम्बन्धी, जगदम्बा श्री र वातावरण संरक्षणसम्बन्धी विभिन्न पुरस्कार प्राप्त गर्नुभएको छ । उहाँले रेडियो सगरमाथामा लामो समय ‘उहिले बाजेका पालामा’ रेडियो शृंखला सञ्चालन गर्नुभएको थियो ।
रिसालले राष्ट्रिय समाचार समिति (रासस)मा प्रमुख समाचारदाताको समेत जिम्मेवारी निर्वाह गर्नुभएको थियो । लामो समयदेखि पत्रकारिता र समाजसेवामा समर्पित रिसालले राससमा काम गर्नुअघि तथ्यांक विभागमा रहेर काम गर्नुभएको थियो । रिसालका ‘साधुलाई सुली’ (जेल डायरी), ‘लोग्नेस्वास्नी’, ‘केही मित्रका चिठी’ कृति र ‘भैरव दाइ’लगायत पुस्तक प्रकाशित छन् ।
वामपन्थी विचारधारा बोक्ने रिसाल २०४८ सालको आमनिर्वाचनमा नेपाल मजदुर किसान पार्टीका तर्फबाट भक्तपुरबाट उमेदवार समेत बन्नु भएको थियो । रिसालका उनका श्रीमती, दुई छोरा र दुई छोरी छन् ।
