अछाम, २७ चैत / अछामको बान्निगढी जयगढ गाउँपालिकास्थित जयगढ बजारमा भएको आगलागीमा २७ वटा घर जल्दा सात करोड भन्दा बढीको धनमाल नष्ट भएको छ ।
मुख्य बजारमा पुष्पराज शर्माले सञ्चालन गरेको आइएमई केन्द्रको सिलिन्डर विस्फोट हुँदा गएराति फैलिएको आगोले बजार ध्वस्त पारेको हो । जलेका २७ घरमध्ये ११ वटामा स्थानीय व्यापारीले पसल सञ्चालन गरेको अछामका प्रहरी प्रमुख ईश्वरीप्रसाद भण्डारीले जनाउनु भयो । उहाँले आगलागीबाट सात करोडभन्दा बढीको क्षति भएको अनुमान गरिएको जानकारी दिँदै पीडितहरूबाट क्षतिको विवरण यथाशीघ्र सङ्कलन गरिने उल्लेख गर्नुभयो ।
मंगलसेन नगरपालिकाको दमकल, सुरक्षाकर्मी तथा स्थानीयवासीको प्रयासमा आगो नियन्त्रणमा लिइएको छ । तस्वीर : धनराज साउद
