दमक, २७ चैत / गुराँसको राजधानी तेह्रथुमको तीनजुरे मिल्केमा कोशी प्रदेश सरकारले बुधबार एक कार्यक्रमकाबीच पर्यटन वर्ष २०८२ को उद्घाटन गर्दै पर्यटन प्रवद्र्धनमा जुट्ने सन्देश दिएको छ ।
प्रधानमन्त्री केपी शर्मा ओलीको अन्यत्रको कार्यक्रम जुधेर उपस्थित हुन सम्भव नभएपछि उपप्रधानमन्त्री प्रकाशमान सिंहले सो कार्यक्रमको उद्घाटन गर्दै पर्यटनका लागि कोशी क्षेत्र निकै महत्वपूर्ण रहेको बताउनु भयो ।
लालीगुरास नगरपालिकामा आयोजित कार्यक्रमको अध्यक्षता गर्नुभएका कोशी प्रदेश सरकारका मुख्यमन्त्री हिक्मतकुमार कार्कीले प्रदेशबाट सन्देश प्रवाह गरेर आधार वर्ष तयार गर्न पर्यटन वर्ष घोषणा गरिएको बताउनु भएको छ ।
कोशी प्रदेशका सबै क्षेत्रहरू पर्यटनको हिसाबले महत्वपूर्ण भएको चर्चा गर्दै मुख्यमन्त्री कार्कीले महत्वपूर्ण क्षेत्रहरूलाई विकास गरेर पर्यटन मार्फत राष्ट्रिय पँुजी निर्माण गरिने बताउनुभयो । स्थानीय तहको सहकार्यमा कोशी पर्यटनको विकास गर्दै नमुना प्रदेशको रुपमा लैजाने मुख्यमन्त्री कार्कीले प्रतिबद्धता व्यक्त गर्नुभयो ।
सुरक्षा निकाय, जनप्रतिनिधि र सरकारी क्षेत्रको व्यवहार सुधार गरेरअघि बढ्दै पर्यटनलाई प्रवद्र्धन गर्ने चाहना रहेको उल्लेख गर्दै मुख्यमन्त्री कार्कीले सबै जातजाति, धर्म संस्कृतिको जगर्ना र त्यसको संरक्षणमा अघि बढ्ने स्पष्ट पार्नुभयो । पर्यटनको माध्यमबाट नेपालको वैदेशिक ऋण र व्यापारघाटा काम गर्न सकिने उल्लेख गर्दै मुख्यमन्त्री कार्कीले ऊर्जा, जलविद्युत पर्यटन, जडीवुटीका क्षेत्रमा काम गर्ने बताउनुभयो ।
उहाँले नेपालको पर्यटकीय क्षेत्रमा भारत र चीनबाट पर्यटन भित्र्याउन सक्नुपर्ने बताउँदै यसका लागि संघीय सरकारको योजना अघि बढ्नुपर्ने उल्लेख गर्नुभयो ।
कोशी प्रदेशलाई बन्द हडतालबाट मुक्त गर्दै यहाँ भएको समस्या वार्ताको माध्यमबाट समाधान गर्न पनि मुख्यमन्त्री कार्कीले आग्रह गर्नुभयो ।
